Nipisat suaannik tunisineq aallartilluaqisoq

Apriilimi sapaatit akunnerini siullerni marlunni Royal Greenlandip suliffissuinut tunitsiviinullu nipisat suaat 2012-imit pingasoriaammik annertunerusut tunineqarsimapput

Apriilimi sapaatit akunnerini siullerni marlunni Royal Greenlandip suliffissuinut tunitsiviinullu 2012-imut sanilliullugu nipisaat suaat pingasoriaammik annertunerusut tunineqarsimapput. Ass.: Leiff Josefsen

- Nipisanniarneq aallarteruttorpoq, ukioq mannalu nipisat suaannik tusineq ingerlalluarpoq.

Taamatut oqaluttuarpoq Royal Greenlandimi ingerlatsinermut pisortaq Møller Lyberth.

Apriilimi sapaatit akunnerini siullerni marlunni Royal Greenlandip suliffissuinut tunitsiviinullu 2012-imut sanilliullugu nipisat suaat pingasoriaammik annertunerusut tunineqarsimapput. Apriilillu sinnerani marloriaammik annertunerusut tunineqarsimallutik.

Royal Greenlandip paasissutissiissutigaa maannangaaq Nuummi, Maniitsumi Napasumilu suaat katillugit 119.987 kiilut nipisaallu 24.326 kiilut tunineqarsimasut, Atammimmi 72.262 kiilut, Kangaamiunilu 30.033 kiilut. Maannangaarlu aamma Ikerasaarsummi 7.295 kiilut, Kangaatsiami 1.948 kiilut Niaqornaarsummilu 182 kiilut tunineqarsimapput.

Sanilliussassatut 2012-imi suaat 58.187 kiilut nipisaallu 35.288 kiilut tunineqarsimapput, Nuummiinnarli tamakkua tunisaasimallutik.

- Imaassinnaavoq Kujataani Qeqqanilu nipisanniarneq siusinnerusukkut naassasoq, tassa nipisaat ukioq manna siusinnerusukkut takkussimammata. Taamaattumillu siornarnit siusinnerusukkut avannamut ingerlaarsinnaallutik, immaqa ullut 14-it iluanni. Tamanna piffissap takutikkumaarpaa, nipisanniarnerlu naappat takujumaarparput ukioq manna nipisaat suaannik annertunerusunik pissarsisimanersugut, Møller Lyberth oqarpoq.

Maannakkorpiaq nipisat suaannik tunisisoqarpoq Narsami, Paamiuni, Qeqertarsuatsiaani, Kangaamiuni, Atammimmi kiisalu Napasumi, Maniitsumi Nuummilu.

Powered by Labrador CMS