Inissiisarfimmi imminorneq inatsisinik atortitsinermut ministerimut annguppoq
Ukioq manna februaarimi Aasianni isertitsivimmi arnap 17-inik ukiullip imminornerata apeqquserpaa, isertitsivimmi paarsisut sulinerminni pisunik alianartunik iliuuseqarnissaminnut piginnaasaqarnersut
Ajornartoornermi upalungaarsimaneq ajunngilaq, Kalaallit Nunaanni isertitsivinni sulisut pisunik alianartunik misigisaqaraangata.
Taamatut paasissutissiivoq inatsisinik atortitsinermut ministeri Morten Bødskov, Socialdemokraterne, Inuit Ataqatigiit tunuliaqutaralugit folketingimut ilaasortamut Sara Olsvigimut akissummini.
Taassuma apeqqutigisimavaa atortussat suut pigineqarnersut, isertitsivimmi sulisut sulinerminni pisunik alianartunik misigisaqaraangata. Assersuutigalugu ukioq manna februaarip 24-anni Aasianni pisimasumi, tassani arnaq 17-inik ukiulik isertitsivimmi imminormat. Apeqqut Sara Olsvigip, IA, Folketingets Grønlandsudvalgianut apeqqutigaa.
Pinerluuteqarsimasunut isumaginniffimmi Pisortaqarfiup paasissutissiissutigaa apeqqutip akineqarnissaanut Kalaallit Nunaanni Pinerluuteqarsimasunik Isumaginniffimmi pisortaq oqaaseqartinneqarsimasoq. Pisortap paasissutissiissutgaa nakuusernermut sioorasaarinermullu pitsaaliuineq pillugit sulisunut politikkeqarlutik, siunertaralugu sulisut, pisunik sakkortuunik alianartunilluunniit misigisaqarsimasut, ikiorserneqarnissaat. Isertitsivimmilu paarsisut akuttunngitsumik pisunik sakkortuunik misigisaqartarput.
Pinaveersaartitsinermik suliniuteqarnissaq pingaartinneqarluarpoq
Taamaattumik pinaveersaartitsinermik suliniuteqarneq immikkut pingaartinneqarpoq.
- Pinngitsoorneqarsinnaanngilarli pissutsit ajortumut ineriartorsinnaanerat, taamatullu pisoqaraangat suliniutinik arlalinnik assigiinngitsunik aallartitsisoqartarpoq. Inissiisarfinni tamani sulisoqarpoq suleqatinik ikiueqqaarnissamik immikkut ilinniagaqartinneqarsimasunik, Morten Bødskov nassuiaavoq.
Pinartunik pisoqaraangat sulisut ingerlaannavik iliuuseqarfiginiarneqartarput. Kingornalu tarnip pissusianik oqaloqatiginnittoqartarpoq, tassani isumaliutit, misigissutsit qisuariarnerillu iternga tikillugu oqaloqatigiissutigineqartarlutik.
Aasianni arnap 17-inik ukiullip imminorneranut atatillugu Kalaallit Nunaanni Pinerluuteqarsimasunik Isumaginniffik paasissutissiisimavoq sulisut, imminornermik pisumi akuusimasut, inissiisarfiup pisortaanit ingerlaannavik suleqammit ikiueqqaarnissamik neqeroorfigineqarsimasut. Pisortaq inissiisarfimmi sulisut suleqatinik ikiueqqaarnissamik ilinniagaqarsimasut marluk aapparaa.
Tamatuma saniatigut Pinerluuteqarsimasunut Isumaginniffimmi Pisortaqarfik inissiisarfimmut takuniaasimavoq.