TUSA 2013 Vejlemi pisussaq aallartisarneqarpoq

Sapaatip akunnerata naanerani tulliuttumi, maajip 4-aanni, TUSA ukiumoortumik Vejlemi DGI-huset-imi ingerlanneqassaaq

TUSA 2012-imi Ikinngutigiit Aalborgimeersut ajugaasut ajugaaqqissinnaassanerlutik. Ass.: Rimdal Th. Høegh

Kalaallit Danmarkimi peqatigiiffiisa ukiumoortumik erinarsornermik unammisarneranni ukiorpassuit matuma siornatigut erinarsoqatigiit kisimiillutillu erinarsortartut taama amerlatigisut peqataaniarlutik nalunaarsimapput. Inuit-mi peqatigiiffiinnit ilaasortanit 23-nit erinarsoqatigiit arfineq-pingasut kisimiillutillu erinarsortartut arfineq-pingasut unamminermi peqataaniarlutik nalunaarsimapput.

TUSA pisartuuvoq Danmarkimi kalaallit nuannaarlutik ilisimasullutillu qilanaarisartagaat. Ualeq erinarsoqatigiit kisimiillutillu erinarsortartut unammiffiat pissanganartoq, kakkannerpaanut pokalinik tunniussinermik naggaserneqartartoq. Unamminerup avataani nipilersortunik aliikkusersuisoqartarpoq. Naggaserneqartarpoq nereqatigiinnermik qitinnermillu, ukioq mannalu Copy Paste kalaallit unnukkut Vejlemi nuannersumik katerisimaarneranni nipilersortooqqissapput.

TUSA-p ingerlanneqarnissaa sioqqullugu pissanganartunik apeqquteqarpoq, soorlu: Ikinngutigiit Aalborgimeersut siorna TUSA-mi ajugaanertik illersorsinnaassavaat taamalu pokali angalaartinneqartartoq pissarsiaralugu. Siorna kisimiittut unammineranni marluinnaat peqataasimapput, ukioq manna arfineq-pingasuussapput, taamaattumik angusarissaarneq ataqqinaataalluassaaq.

Powered by Labrador CMS