Air Greenland: Ulloq unammilligassalik
Timmisartuussinermi sila suli ajornartorsiortitsivoq. Aatsaat Kangerlussuarmi sila pitsanngorujussuarpat timmisartuussinerit ingerlanneqarsinnaapput, Air Greenland oqarpoq
Kitaani silarlunnera timmisartuussinermi ajornartorsiortitsisorujussuuvoq. Sikunarnissaanik anorillu kaavittuliorneranik ilimasaarutit pissutigalugut tallimanngornermi ullaap tungaani nunap iluani timmisartuussinerit ingerlanneqarsinnaasimanngillat, tamannalu pissutigalugu atlantikoq qulaallugu timmisartuussinerit kinguaattoorfiupput.
Air Greenlandimi timmisartuussinermut immikkoortoqarfiup silap qanoq issusia malinnaavigeqqissaarpaa aallarnissamillu pilersaarutit allanngortinnissaat ataavartumik isummerfigisarlugu, soorunamilu isumannaatsuunissaq pingaarnersaatillugu. Suut tamarmik ajornakusoornerulerput Kangerlussuarmissaaq silarlummat pujorluni perserlunilu. Kangerlussuaq pissutsit nalinginnaatillugit timmisartuussinernut amerlanerpaanut taartissamaatitut atorneqartaraluarpoq. Taamaattumik Kangerlussuarmi sila pitsanngorujussuareerpat aatssaat timmisartuussinerit ingerlanneqarsinnaapput.
Aamma atuaruk: JetTime Kangerlussuarmit timmisartuussissaaq
- Pissutsit maannakkutit, tallimanngornermi ullo´qeqqani, taamaatsillugit neriunarpoq nunap iluani timmisartuussinerit ualeru aallarteqqinneqarsinnaasut. Taamaattumik pilersaarutaavoq unnugu Kangerlusuarmit Københavnimut timmisartuussinissaq, unnuarulu allamik, Danmarkiliartut apuunniarlugit. Sulisut malinnaaniarsuataarput, ilaasunut eqqorneqartunut paasissutissanik nutaanik pilersuillutik. Kikkulli tamarmik attaveqarfigineqassapput, pissutsillu paaseqquagut naammagittartoqaqqullugulu, Air Greenland tusagassiorfinnut allakamini allappoq.