Ajorluinnartumik ingerlavoq - Dårligt Nyt-imut tikilluarit
Anders Lund Madsen aqutsisoralugu programmi Dårligt Nyt, sapaatip akunnikkaartumik DR2-mi aallakaatinneqartartoq - sisamanngormat unnukkut Nunatsinni aallakaatinneqarpoq - pissusiviusulli paatsoorneqarsimapput
Niviarsiaqqat 15-it inorlugit ukiullit pingajorarterutaat kinguaassiuutitigut atornerlunneqartarnerannik nutaarsiassaq sisamanngormat unnukkut qallunaat tv-anni sammineqarpoq.
Tamanna pivoq programmimi Dårligt Nyt, aallakaatitsivimmi aqutsisoralugu Anders Lund Madsen.
Programmi equngavoq, nutaarsiassallu ajortut sammineqartarput, tassanilu arlaannaataluunniit "nutaarsiassaatini" saqqummiukkumanngilai. Sisamanngormat unnukkut oqaluttuaq Sermitsiaq.AG-p saqqummiussimasaa sammineqarpoq, tassa Kalaallit Nunaanni inuusuttut atugarisaat, aammalu klassini angajullerni inuusuttut 390-it kinaassutsiminnik isertuussillutik akissutigisimasaat qanga piumassuserinngisaminnik inersimasunik ukioqatiminnilluunniit atoqateqarsimanerminnik.
Niviarsiaqqat pingajorarterutaat akipput 15-it inorlugit ukioqarlutik kinguaassiuutitigut atornerlunneqarsimallutik - tassa inatsisinik unioqqutitsisumik pineqaatissiissutaasinnaasumik.
Pissutsit taamaannerat pissutigalugu erloqinartorujussuit.
Anders Lund Madsenillu programmiani immikkut pissanganarsaarlugit saqqummiunneqarput.
- Nutaamik nalunaarusiassaqartippassi Syddansk Universitetimit suliarineqarsimasumik. Taakkua Kalaallit Nunaanniissimapput. Nikallornartorujussuarnik saqqummiussipput. Maannakkorpiaq Kalaallit Nunaanni niviarsiaqqat pingajorarterutaat kinguaassiuutitigut atornerlunneqarput. Aammaaqqeriartigu. Niviarsiaqqat pingajorarterutaat ilaquttaminnit ikinngutiminnillu maannakkorpiaq pinngitsaalineqarput. Qularnartoqartippara tamanna paasilluarissi. Tassa imaappoq, assigiinnarpaa Koldingimi niviarsiaqqat pingajorarterutaat ilaquttaminnit ikinngutiminnillu pinngitsaalineqartut. Qanoq iliuuseqarfigineqaratik!, Anders Lund Madsen oqarpoq.
Aamma atuaruk: 15-it inorlugit ukiullit pingajorarterutaat atornerlunneqartarput
- Ukiullu 15-it matuma siornatigut aamma taamaattumik misissuisoqarsimavoq. Kalaallit Nunaat pineqaannarpoq. Namminerpiaq issittumi ajortuliortuutivut... Ajorluinnartumik ingerlasoqarpoq, Dårligt Nyt-imut tikilluarit, Anders Lund Madsen oqarpoq.
Programmi takuuk uani - Kalaallit Nunaanni inuusuttut atugarisaannik nalunaarusiaq minutsit siulliit pingasut iluanni takutinneqarpoq.
Pissusiviusut programmimi kukkusumik saqqummiunneqarnerat alarutsigu, taava inuusuttortatsinnut qanoq pitsaanerusumik iliuuseqarsinnaavugut. Sukkut sumiginnaasoqarsimava? Sooq 2013-imi nalunaarusiami atuassavarput inuusuttut 15-it inorlugit ukiullit atornerlunneqartartut? Tamarmik nalugunanngilaat meeqqanik 15-it inorlugit ukiulinnik kinguaassiuutitigut atoqateqarneq inerteqqutaasoq? Ataani oqallinnermi peqataagit.