Sisimiut kujataani radiokut attaveqaatit tamarmik matoqqapput
Aasianni Kystradiomut VHF-imik attaveqaat ajutoorpoq. Teknikerit takuniaassapput - sila ajussanngippat
Ullaassaq tallimanngornermi nal. 04:30 teknikkikkut ajutoorneq pissutigalugu Aasianni Kystradiokut Sisimiuniit kujammut VHF-ikkut radiokut attaveqaat kipisoorpoq. Tamatuma saniatigut nunami tamarmi mellembølgekut attaveeruppoq.
Tamanna pissutigalugu Aasiaat radioat nuna tamakkerlugu mellembølgekut aammalu Sisimiuniit kujammut VHF-ikkut attaveqarfigineqarsinnaanngilaq. Pineqarput kanal 16 - ajunaalernermi isumannaatsuunermilu attaveqaatit aamma sulinermi kanalit.
Tusagassiorfinnut nalunaarutikkut Tele-Post taamatut paasissutissiivoq.
Tele-Postimi Kystradio paasissutissiivoq teknikerit kingoraartissamaatinik nassarlutik Nuummit timmisartumut siullermut ilaallutik Aasiannukassasut, atortut ajoqusersimasut iluarsaakkiartorlugit.
Maannangaaq pilersaarutigineqarpoq nalunaaqutaq 10 timmisartoq Nuummit aallassasoq, sila pissutigalugu ullaaq aallarsinnaasimanngimmat.
Annaassiniarnermik oqartussaasut tamatuminnga paasitinneqarsimapput.