Angerlarsinnaavutit
Qinngutsinnut bussit anorlernera pissutigalugu ullup ingerlanerani ingerlaarunnaarsinneqarput. Maannali isumalluarnarnerulerpoq
Nunatsinni illoqarfiit pingaarnersaanni bussinik angallanneq nalinginnaasumik ingerlanneqalilerpoq. Nuup Bussii naapertorlugit angerlamut angallanneqarnissaq ernummatigineqartariaqanngilaq.
Qinngutsinnut ingerlaarneq ullup ingerlanerani unitsinneqarsimagaluarpoq. Ajornartorsiut tassaasimavoq naluttarfiup Maliup eqqaaniit mittarfiup eqqaata tungaanut aqquserngup anorersuarujussuarneratut sakkortutigisumik anoraasuartaleraluarnera.
- Bussit taama sakkortutigisumik aalatinneqaleraangata navianarsigaangallu ingerlaarneq unitsittariaqartarparput. Maannali anorersuaq inoriaqqoriartulerpoq, anorlileqqinngippallu bussit ullup sinnerani nalinginnaasumik ingerlaassapput, Nuup Bussii nalunaarput.
Atuarfik Hans Lynge silarlunnera pissutigalugu ilaannakuusumik aamma matoqqasimavoq. Unnugulu aaqqissuussinissat arlallit taamaatiinnarneqarsimallutik.