Aqqaluk Lynge oqaatsit pillugit oqallinnermut equngasumut mianersoqqusisoq

ICC-p siulittaasuata politikerit kaammattorpai inooqatigiinnikkut naligiinnginneq ilinniagaqarsimannginnerlu oqaluusereqqullugit. Tassami oqaatsit pillugit oqallinneq tunngavippiaatigut tamatumunnga tunngassuteqarpoq, Aqqaluk Lynge oqarpoq

ICC-p siulittaasua Aqqaluk Lynge oqaatsit pillugit oqallinnermut aamma akuliuppoq. Assiliisoq: Leiff Josefsen

Inuit Ataqatigiit sinnerlugit Inatsisartunut ilaasortaq Naaja Nathanielsen, nammineq oqaasii malillugu kamassimaqaluni, qanoq ilioriusissaaruteqqalluni aliasullunilu qallunaatuinnaq oqaasillit marluinnillu oqaasillit nikassarneqartarnerannik uumissorneqartarnerannillu oqaluttuarineqartartunut atatillugu kipiluttunerminik sapaatip-akunnerata naanerani oqaasertaliivoq.

Naaja Nathanielsen ilaatigut aperivoq inuiaat kalaallit ilumut inuiaanersut inunnik aalajangersimasuniinnaq nuannarisallit, allallunilu 'kalaallit ataatsimoortukkuutaanut immikkoortitilerutsigik tamatuma asersortaanissaa annilaanngatigaara: 'kalaalivinnut' aamma 'kalaaliviunngitsunut'.

Læs "P.I.: Grønlandsksprogede er de mest udsatte"

Læs "Naaja N.: Stop danskerhadet"

Ajornartoornermi ikioqquneq uissuumminartoq tamanna tunngavigalugu, Partii Inuillu sinnerlugit Inatsisartunut ilaasortaq Randi Broberg sassartereersorlu ilaatigullu oqarluni 'oqaatsit pillugit oqallittoqaleraangat ammip qalipaataanik immikkoortitsiniartutut pisuutitsisoqalersarpoq', ICC-p siulittaasua Aqqaluk Lynge maanna sassarterpoq.

- Oqaatsinut atatillugu kipiluttusoqarnera takusinnaavara, kisianni oqallinnerup oqaatsinut piorsarsimassutsimullu tunngasunngortinneqarnissaa mianersoqqussutigerusuppara. Tamannami pineqanngilaq. Kipiluttuneq inooqatigiinnikkut naligiinnginnermik ilinniagakipallaarnermillu tunngaveqarpoq. Pissutsit tamakkua politikerinit oqaluuserineqartariaqaraluarput. Allat tamarmik angusaqarfiunavianngillat, Aqqaluk Lynge KNR-imut oqarpoq.

- Inuiaavugut inuiannik allanik tikilluaqqusillaqqissut, aamma eqqaamassavarput kalaallit kalaallisut oqalussinnaanngitsut naligisatut isigineqartussaammata nunattalu pitsanngorsarneqarnissaanut kivitseqataasussatut, ICC-p siulittaasua KNR-imut oqarpoq.

Aqqaluk Lynge erseqqissaalluni oqarpoq, inuiattut nunasiaataanerup nalaanit ingerlaqqissimasugut kalaaliusutullu nukissaqassusermik takutitsinissamut pissutissaqartugut.

Powered by Labrador CMS