Isummersuutinik allaaserinnittartunngornissamut periarfissaq kingulleq
Sermitsiaq.AG-mi isummersuutinik allaaserinnittartut ilaattut toqqagaanissamut periarfissat kingulleq tassaavoq marlunngorneq apriilip 30-a
Sermitsiaq.AG nittartakkap matuma maajip ingerlanerani nutarterneqarnissaanut atatillugu isummersuutinik allaaserinnittartussarsiornermi saaffiginnissuterpassuarnik ulluni kingullerni tigusaqarsimavoq.
Marlunngormat allaaserisatsitut isummersuutinik allaaserinnittartunik sapiissuseqartunik arfinilinik arfineq-pingasunilluunniit pissarsiorpugut.
Allaaserinnittartut aallaaniarnermik aalisarnermillu, silap pissusaanik, oqaatsinik, atisanik, ilinniagaqartunik, timersornermik, politikkimik allanilluunniit pingaartitsisunik pissarsiorpugut. Naatsumik erseqqissumillu allaaserisaqarnissamut piumassuseqarluarnerit qaammammullu allaaserisanik marlunnik tunniussaqartarsinnaanerit pingaarnerpaavoq.
Aningaasarsiaqartitsisoqassanngilaq, akerlianilli allaaserisavit qisuariarfigineqarluartarnissaat saqqumilaartilluarneqarnissaallu neriorsuutigaarput.
Læs "Er du en af vores skarpe, nye bloggere?"
Titarnernik tallimaniit qulinut nittartakkami aaqqissuisumut Søren Duran Duusimut suulut@sermitsiaq.ag aqqutigalugu allannissamut periarfissat kingulleq tassaavoq marlunngorneq apriilip 30-a. Suna pingaartumik allaaserisarusunnerlugu aamma sooq illit toqqarneqartariaqarnerit oqaluttuarissavat.
Isummersuutitut allaaserisat inummut tunngasuummata kalaallisut qallunaatullu allattarnissat iluaqutaassaaq, naak tamanna soorunami piumasaqaataanngikkaluartoq. Iluaqutaasussaq alla tassaavoq allaaserisannut naleqquttunik assilisaqarnermik nuannarisaqarsinnaanerit.
Saaffiginnittut tamarmik - inernera apeqqutaatinnagu - maajip aallaqqaataani akissuteqarfigineqassapput.