Nuup Bussii bilitsinik peqquserluutilianut iliuuseqalersoq
Inuit sisamat bussernermut allagartanik qaammatikkaartunik peqquserluutiliorsimasut ullut 14-it ingerlanerinnaanni Nuup Bussiinit paasineqarput. Pisut taakkua politiinut nalunaarutigineqarput
Innuttaasut sisamat illoqarfimmi akeqanngitsumik angallanneqarsinnaajumallutik inatsisinit akuerineqartut sinnerlugit nassaarsiullaqqippallaaluatsiarsimapput.
Ilaasut savituut taakkua qaammammut akiliutaasartunik 500 koruuninik akiliinngitsoorniarlutik Nuup Bussiinut qammatikkaartumik allagartaminnik peqquserluutiliorsimapput. Kisianni peqquserluttut paasineqarput, naqitsisit nutaat Nuup Bus-siinit qaammammi kingullermi atorneqalermata.
Bussinillu ingerlatitsisut allagartanik qaammatip ataatsip ingerlareernerani atorneqarunnaareersimasussaagaluartunik pasitsaassisimapput.
– Peqquserlunnerit assigiinngitsut arlallit pineqarput. Pisuni marlunni allagartaq nutaamik ullulerneqarsimavoq, atorsinnaasutut isikkoqalersillugu. Pisumillu ataatsimi kortiutivut suliarilluagaasorujussuarmik assilineqarsimapput, allaallu pappialartaa uagut atortakkatsitut pitsaassuseqarluni, Nuup Bussiini ingerlatsinermut aqutsisoq René Hansen ilisimatitsivoq.
Kortit pisoqalisimasut paasineqanngikkallarmata inuit qanoq amerlatigut salloqittaatinik atuisimasinnaanerat bussiutileqatigiiffimmit ilisimaneqanngilaq.
– Kisianni ullut 14-it ingerlanerinnaanni allagartat sisamat amerlangaatsiartutut isumaqarfigaavut, ingerlatsinermut aqutsisoq oqarpoq.
Bussinullu akeqanngitsumik ilaaniartarneq ajornakusoornerulersinniarlugu suliffeqarfik suliniutinik arlalinnik pilersitsivoq.
Allagartanik qaammammoortunik peqquserluutiliornissaq ajornarnerulersinneqassaaq.
Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk: