Nuummi United nersualaarneqartoq
Robie van Persie pingasoriarluni isertitsimmat United pissartanngornissaminik qulakkeerivoq. Nuummi tuluit arsaattartorsui nalliussineqarput
Manchester United arsaattartut akornanni kunngiupput. Ataasinngornermi unnukkut timersoqatigiiffiup pissartanngornini qulakkeerpaa Aston Villa Old Traffordimii 3-0-imik ajugaaffigigamiuk.
Angusaq taanna Mancherterimi kisimi nuannaarutigineqanngilaq nunarsuarmili sumiiffinni assigiinngitsuni aamma Nuummi.
Nuummi arsaattartunik taakkuninnga illersuisut unnukkut arfineq-pingasut eqqaanni illoqarfimmi biileqattaarput, erfalasulisarlutik biiliminnik siggartaqattaartitsillutik.
Manchester United Tuluit Nunaanni 20-ssaannik pissartanngorput. Unnuk taanna van Persie immikkut tanngassimaarutissaqarpoq. Pingajoqqanik isertitsivoq. Taamaasilluni ukioq unammiuaarfiusoq manna 24-ssaanik isertitsilluni.
Misigisaq nuannersorujussuuvoq. Arsaqatigiiulluta tupinnaannartumik piginnaaneqarpugut, unamminerup kingorna nuannisaqaluni oqarpoq.
Ukiup unammiuaarfiusup naammassinissaanut unamminerit tallimat suli amigaataagaluarput. Kisianni United 84 pointinik pissarsereernikuugami suneqarsinnaanngilaq.