Grønlandsbankimit kisitsisit ajunngitsut
- Sinneqartoorutit naammaginartut. Grønlandsbankimit 2013-ip qaammataanut siullernut naatsorsuutaanik naliliinerit taamaapput. - Inuussutissarsiornermi suliniutit amerlanerit nutaallu takorusukkaluarpavut, aningaaseriviup pisortaa Martin Kviesgaard oqarpoq
Grønlandsbankimit marlunngornermi saqqummiunneqarpoq 2013-ip qaammataanut pingasunut siullernut naatsorsuutit.
Ukioq manna qaammatini siullerni pingasuni akileraarutit suli akilernagit naatsorsuutit 32,1 millioner koruuniupput 2012-imi 32,7 millioner koruuniusut. Angusanit nammineq pigisat 15,1 procentimik ukiumut ernialiissutaasarput. Aningaasanik tuniniaanermi akinik aaqqissuussinerit nalikillisaanerit sioqqullugit 34,7 millioner koruuniupput 2012-imi qaammatit siulliit pingasut 32,6 millioner koruuniusut.
- Ukiup aallartinneranit angusat naammagisimaarluarpavut. Aningaaserivimmi sulisut ulapaaqaat tamatuma saniatigut aningaasartuutit appasinnissaat isumagisinnaasimavarput angusallu ajunngilluinnarlutik, aningaaserivimmi pisortaaneq Martin Kviesgaard oqarpoq.
- Inuiaqatigiit aningaasaqarnerata tarrarsorneratut ippoq ineriartorneq piffissami matumani kigaappoq. Tamatuma saniatigut sullitatsinnik annaasaqarsimavugut, Martin Kviesgaard oqarpoq.
Nalikillisaanerit atorunnaarsitsinerillu aningaaseriviup kaaviiaartitaanit 3,1 millioner koruuninik naleqarput imaluunniit aningaaseriviup taarsigassarsiarititaasa uppernarsaataasalu 0,1 procentiat.
- Naatsorsuutigaarput ukioq manna siornamut naleqqiullugu annikinnerulaamik angusaqassalluta aningaasarsiornerup annikinnerunera pissutigalugu, taamaattumik aningaaserivimmi ukioq pitsaasoq naatsorsuutigigaluarlutigut inuussutissarsiornermi nutaanik pilersitsisoqarnissaa neriuutigaarput. Kalaallit Nunaanni inuussutissarsiutit nutaanik isertitsissutaasinnaasut pisariaqarput, innuttaasut, suliffeqarfiit pisortallu aningaasaqarnerat tatineqassanngippat, Martin Kviesgaard tusagassiivinnut nalunaarpoq.