- Oqaatsigut pillugit aaqqiissutissanik nassaaritsi

Margrethe Thårup Andersen, Oqaasilerineq, Atuakkialerineq, Tusagassiutilerinermilu cand. stud. isumaqarpoq oqaatsigut pillugit politikkerit aaqqiissutissanik nassaartariaqartut

Oqaasilerinermi Atuakkialerinermi Tusagassiutilerinermilu cand. stud. Margrethe Thårup Andersen. Assi.: Leiff Josefsen

- IA-mit Naaja Nathanielsen aamma Partii Inuimit Randi Broberg allaaserisassinni ajornartorsiummik aaqqissuutissassinnik siunertaqanngilasi, taannalu piaartumik qanoq iliuuseqarfigineqartariaqarpoq.

Margrethe Thårup Andersen, cand. stud. Oqaasilerineq, Atuakkialerineq Tusagassiutilerinermilu oqarpoq.

Akunnerup naanerani IA-mit Naaja Nathanielsen ilaatigut oqarpoq nunatsinni ammip qalipaataanik immikkoortitsisoqartartoq malugisarlugu.

- Nalinginnaaleriartuinnarpoq inuit ima oqaluttarnerat, kalaalivik Nuummi najugaqanngilaq, qallunaatullu oqalunnani. Tamanna uuttuutaassappat, taava amerlaqaagut nunami maani kukkusuusut, Naaja Nathanielsen oqarpoq.

Taanna pillugu Partii Inuimit Randi Broberg oqarpoq, oqaatsit pillugit isummersoraangami ilaatigut ammip qalipaataanik immikkoortitsisuunerarneqartarluni.

- Soorunaana taanna ikersuaq ittoq ajornartorsiuterpassuarnik pilersitsisaqili suliarinagulu eqqartornagulu qaangiataaginnaratsigu. Eqqartorniaraluaraangatsigulu ammip qalipaataanik immikkoortitsisuunerarneqarneq kisimi nipaalersaraaq, Randi Broberg oqarpoq.

"P.I.: Kalaallisuinnaq oqaluttut immikkoortitaanerpaajupput"

"Naaja N: Qallunaaluarneq unitsilli"

Oqallinneq illuinnaasiortoq
Margrethe Tharup Andersen isumaqarpoq oqaatsit pillugit oqallinnerni inuit ataasiakkaat sammivallaarneqartartut.

- Oqanngilanga Naaja Nathanielsenip Randi Brobergillu tusagassiutinut nalunaarutaat eqqortuunngitsut, kisianni nammineq misigisimasat kiisalu tusatsiakkat inuiaqatigiinnut tusagassiineq illuinnaasiorpallaaqaaq. Takuneqarsinnaavormi innuttaasunik avissaartuutsitsineruliinnartartut.

Margrethe isumaqarpoq ajornartorsiut pillugu nunatsinni misissuisoqartariaqartoq.

- Misissuineq piviusoq toqqammavigalugu suliarineqartariaqarpoq. Tassanngaanniit takusinnaalissavarput ajornartorsiut qanoq angitiginersoq kiisalu qanoq ingerlaqqittoqarsinnaanersoq takuniassavarput. Soorluuna oqallinnerit maannakkut uninngasutut ittut, Margethe Thårup Andersen oqarpoq.

Powered by Labrador CMS