Nini Tessing tapersersorniarlugu tusarnaartitsineq

Maajip pingajuanni Københavnimi Kalaallit Illuutaanni Small Time Giants tusarnaartitsissapput - aningaasat isertinneqartut kræftimik napparsimasup Nini Tessingip iluaqqutigissavai

tassaapput qavaat pingasut Jyllandillu avannaamiu ataaseq, taakkua kræftimik napparsimasoq Nini Tessing tapersersorniarlugu aalajangersimapput. Assimi erinarsortoq guitarertorlu Miki Jesen. Assi: Small Time Giants Small Time Giants

22-nik ukiulik Nini Tessing kræftimik napparsimasup, tapersersorneqarnera ersarippoq, taanna piffissami matumani kemortippoq timaaniittut kræftip uumasuarartaasa amerliartuinnarnarnerat unitsitsiniarlugu. Taassuminnga tapersersuisut qanittumit ungasissumiillu tutsiuttarput.

Small Time Giants tallimanngornermi maajip pingajuanni Københavnimi Kalaallit Illuutaanni tapersersuillutik tusarnaartitsigunik Nini Tessing taassumalu ilaqutai eqqarsaatimikkut najussavaat. Tusarnaartitsinermit, barimi tunisanit isernermilu akiliutinit sinneqartoorutit tamarmik Nini Tessing pillugu katersuiniarnermut ingerlaqqissapput.

Small Time Giants nipilersugaat, nipilersoqatigiit naapertorlugit kimittupput misigissutsimillu aallaaveqarlutik popimut eqqaanartumik ilaatigulli equngalaartumik appisimaartarlutik.

Nipilersoqatigiit nipilersornikkut imminnut ataqatigiilluinnartut 2009-mi Kujataanit Aarhusimut nuupput Qaqortumi nipilersortartut sungiusartarfianni sinnattut Danmarkimi nipilersortarfinni assigiinngitsuni piviusunngortissinnaanerlugit paasiniarlugu.

Iserneq minnerpaamik 100 koruuninik akeqasaaq isissutissat Københavnimi Kalaallit Illuutaani tuniniarneqalereerlutik. Tusarnaartitsineq nal. 20.00 aallartissaaq.

Sermitsiaq.AG'mi Nini Tessing pilugu allaaserisat tamaasa atuakkit

Powered by Labrador CMS