Asasara Finn Lynge
80-ersuit anguatit peqqillutit, quianartut ilaarutiginnissinnaanerlu suli pigalugit. Ullaaq radioavisimi tusaagakku inuuissiortutit siullertut eqqaavara Íslandimi atuakkiortorsuit ilaata Halldór Laxnessip atuakkiaa ’Kæmpeliv i nord’, Tuusi allappoq
Inatsisartut siulittaasorisimasaat, Tuusi Motzfeldt, Finn Lyngep 80-inik ukioqalerluni nalliuttorsiornerani ullumi ataasinngorneq apriilip 22-anni allappoq:
Oqaluttuaatitoqqavut qanga pissarsuartaqarsimanermik imallit arlaqarput. Tamakkuli ullumikkut akuttoqaat. Anersa pissutsit taamaannerannut tango nalunartoq qanoq tapassanerlugu pimoorullugu ilinniarusuttoqarsimanngitsoq immaqaluunniit ilikkarusuttut ikippallaarsimasut? Illit ullumikkut pissartatuaraatsigit, peqateqarsimaguimmi ersialaanngeqaat.
Ilisimasarpassuavit qaqqavut portusuut qaangeqqavaat. Tamakkulu ilisimasatit tamatsinnut qujanartumik tukkuujoorutigaatsit, inunnguuseralugu alapernaassutsimik suli pigisaqartunut ilisimasaqarnerulernissamik tunissutitut. Ilumullimi amerlanerugaluarutta nassuerutiginnittut suulluunniit ilisimasat, nuanninngikkaluartunut allaat, tassaammata suulluunniit suliniutit malunnaateqartumik sunniutillit aallarnisarnissaannut pisariaqartut.
Kingullertut AG-mi allaaserisat ’Ilami utoqqatsinassusia!’ isummavit qilersorsimanngissusaannut takussutissaalluarpoq.
Ukiut kingulliit 50 ingerlarsornerini naapittarpugut. Naapeqqaarattali tamatigut silarsuara tarpaallatsittarpat. Siullerpaamik Nuummi illoqarfiup immikkoortuani Qaqortumi amerikamiut tupersuanni najugaqartutit kalaallit oqaatsitsinnik ilikkaqqikkusuttutit ilinniartippagit. Taamani tango qanoq tapartariaqarnerata nalunassusaa pinnagu kalaallit oqaatsitta uterfiginiarnerat sammivarput..
Ullut ukiullu ingerlapput, uagullumi ingerlaqatigaarput, immikkoorluta. Tullianik naapippugut Nuummi katuullit oqaluffiani. Naapinnermi tassani suliassara siulleq tassa påskimi nalliuttorsiorpalaartumik naalagiarnermi akioriissut erinaanut akunnattuunngitsumik nutserakku. Aammami ulluni taakkunani sapaatip akunneranut ataaseq-marloriarluta arlaliusugut franskit oqaasiinik ilinniartittarpatsigut, titartakkat Tin Tin nuannivissumik ilinniutigalugit.
Nallerneq ajornartumik oqallorissuseqarputit oqalliserisamullu tunngavilersuillaqqillutit. Oqaatsit arlallit eqarinagit. Qujanartumik oqalloriinnanngilatit, maannamummi atuakkat ikinngitsut atuartut silarsuatsinnik annertusisitsisut naammassisimavatit. Atuakkianni inuttut qanoq torersumik pissuseqarnissarput naleqqavit pingaartut ilagilluinnarpaat. Immitsinnut piumaffiginerunissaq ujartortuarpat pingaarnertut ilisimasaqarnerulernissaq angoqqullugu.
Atuakkiortoqativit ilaata, Svend Erik Sørensenip, oqaatsit allassimasut oqalullunilu aninneqartut ima oqaasertalerpai:
”Oqaatsit allassimasut angakkuaasutut ipput
oqalulluni aninneqartut nipaat
aanngareersoq najummisarpaat
allassimasuullutik sunit tamanit
isertukkat pingaarnersaat ersersittarpaat – isuma”
Ullorsiorluarna. Nersugassaavutit
Tuusi, Igalikumi