P.I.: Kalaallisuinnaq oqaluttut immikkoortitaanerpaajupput
Partii Inuit tunuliaqutaralugit politikkeri Randi Broberg isumaqarpoq, nunasiaataasimanerup ajornartorsiutai Kalaallit Nunaanni suli ajornartorsiutaasut. Oqaatsillu pillugit oqallinnerup tamanna takutikkaa oqarluni, taamaattumillu inuiaqatigiinni oqallittoqartariaqartoq kammattuuteqarluni
- Qanortoq uanga kalaaleqatikkalu kalaallisuinnaq oqaluttut paasineqarta. Uagummi tassaagatta taakkuusut nunatsinni immikkoortitaanerpaat. Aali nunatsinni.
Partii Inuit tunuliaqutaralugit Inatsisartunut ilaasortaq Randi Broberg oqarpoq. IA-mit Naaja Nathanielsen akunnerup naanerani oqaatsit pillugit oqallissaarutaanut Randi Broberg tusagassiutinut nalunaarummi taama ilaatigut ilanngussaqarpoq. Naaja Nathanielsen ilaatigut ima oqarpoq:
- Nalinginnaaleriartuinnarpoq inuit ima oqaluttarnerat, kalaalivik Nuummi najugaqanngilaq, qallunaatullu oqalunnani. Tamanna uuttuutaassappat, taava amerlaqaagut nunami maani kukkusuusut.
Ammip qalipaataanik immikkoortitsisuunerarneqartarneq
Randi Brobergip oqaatigaa oqaatsit pillugit oqallinnerit sakkortusinnaasartut, tamannalu pillugu oqallinnermi ammip qalipaataanik immikkoortitsisuunerarlugu taaneqartarluni.
- Soorunaana taanna ikersuaq ittoq ajornartorsiuterpassuarnik pilersitsisaqili suliarinagulu eqqartornagulu qaangiataaginnaratsigu. Eqqartorniaraluaraangatsigulu ammip qalipaataanik immikkoortitsisuunerarneqarneq kisimi nipaalersaraaq, Randi Broberg oqarpoq.
Ajornartorsiutit aaqqinneqarlik
Randi Brobergip kaammattuutigaa inuiaqatigiinni ajornartorsiutit pillugit oqallittoqartariaqartoq.
- Oqaloqatigiinniarta immitsinnut nipangersarnata. Tamattaana annerisatsinnik kamannarisatsinnillu qaqilerinissarput pisariaqartikkipput. Arlaannaalluunniit eqqortutut eqqunngitsutullu inissinneqarsinnaanngilaq.
- Suli qaangiisimanngitsut sullitsigit ataqqillugit uummatai paaralugit, manngersarnagit suleqatigitigit, Randi Broberg oqarpoq.