Royal Greenland sulisussarsiortoq
Royal Greenland aasaanerani ulapaarnissamut sulisussarsiorluni piareersarpoq, inuit illoqarfimmut nunaqarfimmulluunniit allamut nuukkallarlutik qaammatini arlalinni suliartorumasut periarfissinneqarput
Angalanissaq akilerneqassaaq aamma inissaq qulakkeerneqassaaq.
Tamanna Royal Greenlandimit neriorsuutigineqarpoq aasaanerani sulisussanik qulakkeerinninniarnermi suliffeqarfissuullu aasaanerani sulisussat pissarsiarneqarnissaat maanna qulakkeerniarlugit aallartereerpoq.
Paamiuni, Qasigiannguani kiisalu Uummannami nunaqarfiinilu Ukkusissani, Nuugaatsiami Ikerasammilu tunisassiorfinni sulisussat katillugit 68-it sulisussarsiariniarneqarput.
- Royal Greenlandip kommunit sisamat suleqatigalugit aasaanerani sulisussanik 68-inik illoqarfinni nunaqarfinnilu pineqartuni tunisassiorfinni sulerusussinnaasunik sulisussarsiulerpoq. Sulisussarsiarineqartut angalanerannik akiliunneqassapput najugaqarfinnilu atortorissaarutitalinni, soorlu errorsiveqarlutillu igaffeqarlutillu isiginnaaruteqarlutillu assigisaannillu atortorissaarutilinni najugaqartinneqassapput, aammalu suliffimmi pitsaasunik atugaqartinneqassallutik, Sulisoqarnermi Pikkorissaanermilu ingerlatsisoq Søren Olsen Damgaard oqarpoq.
Royal Greenlandip Uummannimi nunaqarfiinilu sulisunik 28-nik, Qasigiannguani 15-inik kiisalu Paamiuni 25-nik atorfinitsitsinissani pisariaqartippaa. Kommunini paasiniaanerit neriunartoqarput, aaqqissuisullu neriulluarput.
- Sulisussarsiornitta inerneriumaagaanik apriilip naalernerani paasisaqarnissarput naatsorsuutigaarput, neriuutigaarpullu illoqarfinni nunaqarfinnilu pineqartuni innuttaasut arnanik angutinillu suliartortunik taamalu aasaanerani sulisussaaleqinermik akiueqataarusullutik suliartortunik tikilluaqqusinissaat neriuutigaarput, Søren Olsen Damgaard oqarpoq.