Oqaaseqaat: Aleqap nipaannerujussua
Tusagassiuutinut matoqqanerup qanoq ingerlanneqarsinnaaneranut Naalakkersuisut siulittaasuata Danmarkimut pisortatigoortumik angalanera assersuutissaalluarpoq
Oqaaseqaat, Sermitsiaq.AG-mi nittartakkami aaqqissuisumit, Søren Duran Duusimit:
Aviisimi Sermitsiami sapaatip-akunnerani matumani pingaarnertut allaaserisami atuarneqarsinnaasutut Naalakkersuisut siulittaasuata Aleqa Hammondip, Siumut, oqaaseqartinniarnissaa nunatsinni tusagassiortunut ajornakusoortorujussuuvoq - ajornarluinnanngippat.
Aleqa Hammond Naalakkersuisut siulittaasuattut Danmarkimut pisortatigoortumik angalanerminit naluneqanngitsutut uteqqammerpoqt. Angalaneq aallarnissaq sioqqulluguli tusagassiortunit isigalugu ajutoorpoq, Nalaakkersuisut siulittaasuata Danmarkimut pisortatigoortumik angalanissaa Danmarkimi atuagassiami Ugebrevet A4-mi oqaaseqatigiit minnerit aqqutigalugit maani nunatsinni tusagassiortunit nalaatsornerinnakkut paasineqarmat. Allaaserisaq taanna ataasinngornermi saqqummiunneqarpoq - tassa ulloq Danmarkimut angalanerup aallartiffissaa eqqorlugu.
Nunatsinni naalakkersuisut siulittaasuata tikeraarnissaa Statsministereqarfiup tusagassiortunut kiffartuussivianit aamma ilisimatitsissutigineqarpoq, kisianni ilaatigut ministeriunermut Helle Thorning-Schmidtimut, Socialdemokraterne, kingornalu sapaatip-akunnerani matumani pingasunngornermi dronning Margrethemut Amalienborgimut ilassinnikkiartorluni tikeraarneq oqaluttuarisaanermut pingaarutilik pillugu ilaatigut Nalaakkersuisut siulittaasuat Aleqa Hammond, taassuma tusagassisarnermi ataqatigiissaarisua Julie Rademacher, partii Siumut imaluunniit Namminersorlutik Oqartussani tusagassiivik Nunatsinni namminermi tusagassiuutinut ilisimatitsissuteqanngillat.
Læs "Sermitsiaq kritiserer radiotavs Aleqa"
Kunngikkormiunut ilassinnikkiartorneq pulaareernerup kingorna Sermitsiaq.AG-mit arlaleriarluni oqaaseqaatinik pissarsiniarfigineqarsimagaluarpoq, Nalaakkersuisulli siulittaasuata tusagassiisarnermi ataqatigiissaarisuanit Julie Rademacherimit tusagassiorfinnut nalunaarut siulleq marlunngornermi nal. 15.32 nunatsinni tusagassiorfinnut nassiunneqartoq taamaallaat innersuussutigineqarpoq, tassanilu Aleqa Hammondimit issuagaq Amalienborgimi pulaarnermut attuumassuteqartutuaq tulliuttuni ilanngunneqartoq atuarneqarsinnaalluni:
- Naalakkersuisuni siulitaasunngortup Danmarkimut tikeraaqqaarneranut atatillugu Dronningimik naapitsisalernissaanik aaqqissuussisalernissamik aallarniisinnaagama tulluusimaaqaanga.
- Ilassinnikkiartorneq pillugu allamik (Aleqa Hammond, aaqq.) oqaasissaqanngilaq, ilassinnikkiartornerup kingorna, Sermitsiaq.AG tamatuma imarisaanik qanorlu ingerlasimaneranik malittarinneqqinniarluni apeqquteqarmat Julie Rademacher oqarpoq.
Aleqa, toqqorterunnaarit
Namminersorlutik Oqartussat tusagassiiviat sisamanngornermi ualikkut tusagassiortunut nalunaarummik nutaamik nassiussaqarpoq Naalakkersuisut siulittaasuata oqaasiinik issuakkanik nutaanik imalimmik dronningimut ilassinnikkiartornissaq sioqqullugu issuagaq siusinnerusukkut saqqummiunneqartoq ilanngullugu.
Isornartorsiuineq tusagassiisarnermi ataqatigiissaarisumut Julie Rademacherimut Sermitsiaq.AG-p isummerfigeqqusimavaa.
Aap, usimi. Partii Inuit siulittaasuannut Nikku Olsenimut tunngatillugu pisut aamma eqqaaneqarsinnaapput, tassami Aleqa Hammond apeqqarissaarfiginninnissaq pillugu Sermitsiaq.AG-mut KNR-imulluunniit peqataajumasimanngilaq, naak Naalakkersuisut siulittaasuata toqqorterunnaarluni sassarternissaa naalakkersuisullu siulittaasuannut naapertuuttumik akisussaaffimmik, aqutsisuunermik piginnaaneqarnermilluunniit ersersitsinissaa qinersisartunit illuatungiliuttunilku arlaleriarluni kaammattuutigineqartarsimagaluartoq.