Uku angutit politiinit ujarneqarput
18-inik ukiulik Hans Kunuk Berthelsen aamma Jens Møller, 31-nik ukiulik Nuummi politiinit ujarneqarput. Taakkua pineqaatissinneqarsimasunut inissiisarfimmit qimaasimapput
Aammaasiit pineqaatissinneqarsimasut inissiisarfiannit qimaasoqaqqippoq.
Tamatumuuna 18-inik ukiulik Hans Kunuk Berthelsen aamma 31-nik ukiulik Jens Møller, taakkua Nuummi pineqaatissinneqarsimasut inissiisarfiannit sapaammi qimaapput.
Taama oqarpoq Søren Bendtsen, taanna illoqarfiit pingaarnersaanni politiit pisortarigallarpaat.
Angutit taakkua marluk inoqatiminnut ulorianartumik pissusilersorsimanertik pillugu pineqaatissinneqarnikuupput.
Inuit Hans Kunuk Berthelsen aamma Jens Møller pillugit paasissutissaatillit sumiinnarannilluunniit ilisimannittut qinnuigineqarput politiinut saaffiginneqqullugit.
Søren Bendtsenip ilanngullugu ilisimatitsissutigaa Pinerluttaalisitsinermut inatsit naapertorlugu parnaarussanik qimaasunik ikiuisut unnerluunneqarsinnaammata.
Nuummi politiit oqarasuaammut 32 14 48 saaffigineqarsinnaapput.
Sapaatip akunnerata siuliani Sisimiuni politiit nalunaarutigaat pineqaatissinneqarsimasut inoqatiminnut ulorianartorsiortitsisinnaasut ullormi ataatsimi qimaaqqareerlutik pineqaatissinneqarsimasut inissiisarfiannut utertinneqarsimasut.