Imak: Atuarfitsialak nalilersuiffigineqarli!

Maannakkut meeqqat atuarfiat - ukiut qulit qaangiuppataanngitsoq - isornartorsiuisumik misissuiffigineqartariaqartoq ilinniartitsisut peqatigiiffianni siulittaasoq Sivso Dorph oqarpoq

- Maannakkut meeraasut eqqarsaatigalugit meeqqat atuarfiannik nalilersuisariaqarpugut, allatut iliorsinnaangilagut, ilinniartitsisut peqatigiiffianni siulittaasoq Sivso Dorph oqarpoq. Assiliisoq: Leiff Josefsen

Alloriarfinni aamma misilitsinnerni angusat ajorpallaaqimmata meeqqallu siunissaannik ajorpallaaqimmata ilinniartitsisut peqatigiiffianni siulittaasup Sivso Dorphip pingasunngormat meeqqat atuarfiata ingerlanneqarnera isornartorsiorujussuarpaa.

- Arlaannaannulluunniit attuumassuteqanngitsut politikkimut, isummertarnermut siumulluunniit aalajangersareersimasunut qissiminnatik eqqortumik nalilersuisuunissaat siunnersuutigaarput.

Ilinniartitsisut sinniisoqarfiat ulluni makkunani Ilulissaniittoq isumaqarpoq Atuarfitsialak isornartorsiuisumik misissuiffigineqartariaqartoq – ukiut qulit qaangiuppataanngitsoq.

Atuaruk »Ilinniartitsisut: Meerarpassuit siunissaat ajorpoq«

Atuaruk: Sivso Imak-imi siulittaasutut qinigaaqqittoq

Meeqqat ilinniagaqarnerat immeraassutigaat
Sivso Dorphip isumaa malillugu politikerit allaffissornermillu suliaqartut atuartitseriaaseq ataasiinnaq, pitsaasumik atuartitseriaatsimik taaneqartartoq, siunniukkamikku meeqqat kinguaariit arlallit ilinniagaqarnissaat »immeraassutigigaat«.

- Oqaaseq angakkuaganngorpoq – angakkuaat tassanngaanneq meeqqat atuarfiannik tamarmik allanngortitsisinnaasoq. Meeqqat atuarfianni inuttut ajornartorsiuterpassuaqartillugu atuartitseriaatsimik ataasiinnarmik siunniussaqarneq illuinnaasiorneruallaaqaaq. Atuartitsinermi periutsit amerlanerusut atortariaqarpavut.

Meeqqat atuarfiannik nalilersuisariaqarput
- Maannakkut meeraasut eqqarsaatigalugit meeqqat atuarfiannik nalilersuisariaqarpugut, allatut iliorsinnaangilagut. Meeqqat atuarfiat pillugu inatsit alloriarfinni misilitsinnernilu taama ajortigisunik angusiffiusartoq piffissaajaatigivallaareerparput, Sivso Dorph tusagassiuutinut nalunaarummi allappoq.
2010-mi qeqqani nalilersuinermi ilinniartitsisut immikkullu ilisimasallit atuarfik pillugu peqqussut 2002-meersoq atorsinnaannginnerarpaat. Nalilersuisut allannguutissatut arlalinnik siunnersuuteqarput. Kisianni siunnersuutit tamakku ukiaq Inatsisartut atuarfik pillugu inatsit akuersissutigigamikku ilanngutinngikkaat inatsimmi misissuinerup takutippaa, Imak-imit erseqqissaasoqarpoq.

Powered by Labrador CMS