Naliliisartup Air Greenland pitsageqaa
Politikenimi tusagassiortoq timmisartornini nuannaarutigeqaa angalanissaq timmisartuutileqatigiiffimmit aamma World of Greenlandimit pissarsiarisimavaa
Københavnimit Kangerlussuarmut uterlugulu angalaneq Politikenimi tusagassiortup Lea Pagh-ip assut misigisaqarfigisimavaa, taassuma Air Greenland pingaartumillu timmisartuutileqatigiiffiup atlanti qulaallugu timmisartoq, Norsami atugassarititaasut imannaannaq nersualaarnissaa annilaanngatiginngilaa.
Kiffartuussineq pitsassuuvoq, nerisassat mamarluarlutik sassaallernerlu torrallataalluni, naliliinermini ima qulequtsikkamini ’Flytjek: Grønlandsk luftfartssucces leverer international klasse’ allappoq.
- Pitsaaqqutit annerpaartaat tassa nissut inissaqarluarnerat. Allattunga 174 centimeterinik takissuseqarpunga aatsaat perngaamik akikitsumik angalasut akornanni taamak nissunut inissaqartiginera malugaara. Pitsaaqqutaasa ilagaat ilorrisimaarnarnera kiisalu angalanermik tamakkiisumik misigisaq, Lea Pagh kingorna politiken.dk-mi naliliinermini allappoq.
Naliliinermi pitsaanngitsutuatut taasat tassaapput in-flight-entertainmentimik atortut ajoqquteqarnerat kiisalu omeletsip gummitut misigisimanarnera.
Naliliinerup naajartornerani Politikenimi tusagassiortup saqisut nerisassallu eqqaavai:
Mamartut, sukkasuut naleqqulluartullu
- Sutigut tamatigut timmisartumi sulisut imeruersaatinik nerisassanillu tunniussuinerat sukkasuumik naleqquttumillu ingerlanneqarpoq. Kangerlussuup tungaanut aqqummi sassaalliutigineqartut uunalaarput, kisianni omeletsi gummitut ippoq, iffiap saniatigut bollu, immussuaq aamma muffini sukkulaamit sanaaq. Kinguleqqiutit taakkunannga pitsaanersaapput.
- Angerlamut aqqummi lasagne pitsassuaq mamarluartorlu sassaalliutigineqarpoq aatsaat taamak mamartigisumik timmisartorninni ussiivunga. Nerisassat imigassallu billitsip akianut naleqqulluarput, Lea Pagh allappoq.
Politiken, Air Greenlandimit aamma World of Greenlandimit qaaqquneqarsimavoq.
Naliliineq tamakkiisoq qallunaatut uani atuarsinnaavat