Small Time Giants Europami tusarnaartitsiartornissaminnut siullermut piareerput
Nipilersoqatigiit ingerlalluartut sapaatip-akunnerani matumani Europap avannaani tusarnaartitsiartorlutik siullermeerlutik angalalissapput
Small Time Giants nunat allat tiguarnissaannut piareerput.
Nipilersoqatigiit Kujataaneersut postrockimik, indierockimik digitale samplesinillu akuleriissitsillutik nipilersortartut siorna saqqummersitseqqaarnermik kingorna ingerlarsorsimapput. Siorna Aasianni Nipiaa Rock Festivalimi, Nuummi Katuami aamma 'Kalaallit Nunaat Tivolimi' tusarnaartitsipput.
Kalaallit nipilersugaannik allatoornerulaartunik nunat allat maanna aamma tusarnaarusutsassimasutut isikkoqalerput.
Danmarkimi takutitsinerit arlalissuit nunani allani attaveqarfissanik kinguneqarsimapput. Attaveqarfiit taakkua ilaat Hollandimi, Tysklandimi, Danmarkimi, Sverigemi Norgmeilu sapaatip-akunnerini marlunni tusarnaartitsiartorluni angalanissamik kinguneqarput.
Kalaallit tulluusimaarutigisaat
- Danmarkimut nuukkattali nunat killeqarfii akimorlugit kalaallisut passitsinnit takutitaqarnerulaalernissarput anguniagarilerparput. Tusarnaartitsisarniarpugut inuiaat kalaallit qanga inuunerannik siunissamilu inuunissaannik ersersitsisunik - pingaartumik inunnut nipilersoriaatsitsinnik piorsarsimassutsitsinnillu immaqa ilisimasaqanngitsunut, erinarsortoq guitarertorlu, Miki Jensen, Sermitsiaq.AG-mut oqarpoq.
Tusarnaartitsiartorluni angalanerup Oakfield Music Group suleqatigalugu aamma Napamit tapiiffigineqarluni pisinnaalersimasup ingerlanerani Small Time Giantsikkormiut paarlakaajaallutik nipilersoqatigiit nittargaanni allattarniarput.
Tusarnaartitsiartorluni angalanermut Small Time Giantsikkut saniatigut angalaqataasussat tassaapput Paperplane (Tuluit Nunaat) aamma Firstborn (Sverige).
Ullut tusarnaartitsiviusussat:
- 17. april: Larh, Tyskland - Schlachtof
- 18. april: Venray, Holland - Riddim
- 19. april: København, Danmark - Lions & Barrels
- 22. april: Aarhus, Danmark - Backstage
- 23. april: Göteborg, Sverige - Arena29
- 25. april: Falkenberg, Sverige - Ruby Red
- 26. april: Stockholm, Sverige - Slussen 7
- 27. april: Eskilstuna, Sverige - Ungdommenshus
- 28. april: Oslo, Norge - Revolver