USA-mit Kalaallit Nunaat innersuunneqarpoq
Amerikamiut kalaallinut ilinnigaqartunut Danmarkimiittunut: - Nunarsuarmioqataaleritsi. Piumagussi piumanngikkaluarussilunniit allanngortoqartussaavoq, Travis Sevy kalaallinut ilinniartunut oqarpoq
Danmarkimi aallartitaqarfinni siullersaalluni, aap, nunarsuarmi tamarmi siullersaalluni, Amerikamiut aallartitaqarfianni nittartakkami Kalaallit Nunaat namminersortutut eqqaneqarpoq.
Danmarkimi nittartagaq iserfigalugu Kalaallit Nunaat pillugu paasissutissanik pissarfissiunaasumi taamatut pisoqarpoq.
Nittartakkami tassani assersuutigalugu Thulemi Amerikamiut Sakkutooqarfiat pillugu paasissutissat pissarsiarineqarsinnaapput, sakkutooqarfiup sananeqarnera pillugu video takuneqarsinnaavoq, Kalaallit Nunaanni ilisimatusarnissamik pilersaarutit USA-mit suliarineqartut takuneqarsinnaapput soorunalumi aamma kisitsisit piviusut Kalaallit Nunaanni innuttaasut amerlassusii, nunap annertussusia il.il. pillugit paasissutissat pissarsiarineqarsinnaapput.
Aamma una atuaruk: Periarfissat Avalak-mit qitiutinneqarput
Qupperneq Danmarkimi Amerikamiut aallartitaqarfianni Travis Sevy-imit arfininngormat Horsensimi ilinniartitaaneq pillugu isumasioqatigiinnermi Avalak-mit aaqqissuunneqartumi ilisaritinneqarpoq. Isumasioqatigiinnermi assersuutigalugu Amerikamiut aallartitaqarfiannit, Royal Greenlandimit aamma Air Greenlandimit peqataasut ilinniarnissamut periarfissat kalaallinut ilinniagaqartunut saqqummiussuuppaat.
- Nunarsuarmiut tamarmik Kalaallit Nunaat isigaat. Aamma uagut USA-mit isigaarput. Ilissi siunissami aqutsisuusussaavusi. Nunarsuarmioqatigiinngoritsi. Piumagussi piumanngikkaluarussiluunniit allanngortoqartussaavoq, Travis Sevy Avalak-mi ilinniartunut 53-inut oqarpoq.
Amerikamiut aallartitaqarfiat uani nassaarisinnaavat