Kræftimik napparsimasut ikiorniarpaat
Nammineq piumassutsimik suliniartut aningaasaateqarfiliorniarput kræftimik napparsimasut qanigisaasalu ikiornissaat siunertaralugu. Katersuiniarluni tusarnaartitsineq Nuummi Illorsuarmi Timersortarfimmi maajip 31-at pissaaq
Nappaassuarmik kræftimik napparsimasut ikinngitsut kisimiillutik Danmarkimut suliaritikkiartortarput. Timi kisimi ilungersorneq ajorpoq – aammali eqqarsaatitigut oqimaattorsiortarput qanigisatik kilometerinik tusintilinnik ungasitsigalugit.
Nammineq piumassutsimik suliniartut inuppaaluit qanoq iliuuseqarusuummerput aningaasaateqarfiliorniarlutillu suliniarlutik.
- Siullermik isumaagaluarpoq Nini Tessingip Qaqortumeersup ikiornissaa. Kisianni inuit allat aamma ikiorusuppagut taamaattumillu aningaasaateqarfiliornissaq siunniullugu, aallarnisaaqataasut Uiloq Mathæussen, Sørine Steenholdt aamma Anna Karina Madsen Sermitsiaq.AG-mut oqaluttuarput taakkulu suliniaqatigiiffimminni ’Tasiu’mik taagorallarput.
Ilaquttat ungaseqaat
Kræftimik napparsimasorpassuit Rigshospitalimut suliaritikkiartortarput ilaatigut piffissaq sivisooq nakorsarneqartarlutik ilaquttatillu amerlasuutigut najortigisinnaasarnagit.
- Aningaasaateqarfimmi anguniarparput napparsimasut ilaqutaasullu allatigut Danmarkimut angalanermut najugaqarnermullu tapiiffineqarsinnaanngitsut ikiornissaat. Aatsaat aallartisarfimmiippugut taamaattumillu oqaatigisinnaanagu qaqugu aningaasanik tunniussisinnaalissanerluta. Apeqqutaalluinnarpoq aningaasanik katersuiniarnerput qanoq pilertortigisumik pisinnaanersoq, aallarnisaasut oqarput.
Suliniaqatigiit maanna 30-it missaanniillutik Nuummi Illorsuarmi Timersortarfimmi cafeteriami marlunngornikkut nalunaaqutaq 19.00 naapittarput.
- Suliniaqatigiit nutaamik atertaartussaavugut atissarsiornerlu facebookimi quppernerput Tasiu aqqutigalugu marlunngornerup tungaanut ingerlavoq.
- Isumaqarpugut maannamut aterput Tasiortamut assiguallaartoq taamaattumik akissarsiartalimmik unammisitsivugut, suliniaqatigiit oqarput.
Katersuiniarluni tusarnaartitsineq Nuummi Illorsuarmi Timersortarfimmi pissaaq maajip 31-at tassanilu peqaasussat tamarmik piumassutsiminnik peqataassapput. Taamaattoq aaqqissuisut suli pisariaqartippaat nammineq piumassutsimik ikiuutussat amerlanerit.