Kujataani nuna sajuttoq
Sakkortunngikkaluamik nunap sajunnera Narsarsuarmi ippassaq unnukkut malugineqarpoq Richterillu nunap sajunneranut uuttuutaani 4,8-mut uuttorneqarluni
- Allaanngivippoq nivattaassuaq bulldozeri silatinnguatsinni nipiliortorsuulluni saneqquttoq, Narsarsuarmiit Kristina Lund Sermitsiaq.AG-mut oqaluttuarpoq ippassaq unnukkut nalunaaqutaq qulingiluat qaangilaraa misigisani pillugu.
- Sekundit qulit missaannik sivisussuseqarpoq kisianni sivisoorujussuartut misinnarpoq ilisivimmillu igalaamerngit nipiliorlutik, Kristina Lund oqarpoq.
Danmarkimi nunatsinnilu ujarassiuut misissuisarfiannut GEUS-mut nalunaarut Narsarsuarmiit aamma anngunneqarpoq taakkulu uppernarsarpaat ilumut nuna sajussimasoq.
- Sakkortunngikkaluamik nuna sajuppoq Richterip uuttuutaani 4,8-mut uuttorneqarluni. Kisianni qulakkiivillugu paasinngilarput suna pissutaasimasinnaanersoq, nunap sajuttarneranik immikkut ilisimasalik Peter Foss Sermitsiaq.AG-mut oqarpoq.
- Nunap sajunnera kujataani arlalinni malugineqarsinnaasimassaaq aammalu tamaani siornatigut nuna sajuttareernikuuvoq, Peter Foss oqarpoq.
Nunap sajunneranut takussutissaq takuuk