SIK aamma GA isumaqatigiissut nutaaq pillugu naammagisimaarinnittut
Kattuffissuit taakkua marluk sulisitsisut namminersortut suliffeqarfiutaanni tamani isumaqatigiissuteqarput 'tamanit naammagisimaarneqarsinnaasumik'
Sulisitsisut namminersortut suliffeqarfiutaanni sulisut tamaasa pillugit GA aamma SIK ukiunut pingasunut isumaqatigiissusiorput.
Taama SIK-p siulittaasua Jess G. Berthelsen aamma GA-p pisortaa Brian Buus Pedersen peqatigiilluni tusagassiuutinut nalunaarummi nalunaarput.
Akissarsiat utoqqalinersiassallu qaffannerisa saniatigut maannakkut aamma isumaqatigiissutigineqarpoq ’Isumaginninnermut Aningaasaateqarfik’ pilersinneqassasoq. Aningaasaateqarfiliornerup kingunerissavaa SIK-mut ilaasortat napparsimaruloornermut toqusoornermullu atatillugu aningaasatigut tapiiffigineqarnissaminnik qinnuteqaateqarsinnaalernerat.
- Pitsaasumik isumaqatigiissuteqarneq angusinnaasimavarput isumaqatigiinniarnerit inussiarnisaartumik ingerlanneqarsimanerat minnerunngitsumik pissutigalugu, SIK-p siulittaasua, Jess G. Berthelsen, oqarpoq.
- Isumaginninnermut Aningaasaateqarfik SIK-miit iliuusaavoq pitsaalluinnartoq, ajornartorsiulersummi tassuunakkut ikiorserneqarsinnaammata, GA-p pisortaa, Brian Buus Pedersen, oqarpoq.
Taanna ilassuteqarluni oqarpoq, isumaqatigiissut nutaaq angusaqarusulluni pitsaasumik isumaqatigiinniarnertigut anguneqarsimasoq, tamannalu tamanit naammagisimaarneqarsinnaasoq.