Ukiuni 600-ni aasaasartut aatsaat kiatsigaat
Nunarsuup affaani avannarlermi kiattorujussuuvoq - ukiut 600-t ingerlaneranni aatsaat taama kiatsigaaq
Ækvatorip Qalasersuullu akornat kiattorujussuuvoq. Nunarsuup affaani avannarlermi aasat ukiut 600-t ingerlaneranni aatsaat taama kiatsigaat.
Tamanna ilisimatuussutsikkut atuagassiakkut Naturekkut uppernarsarneqarpoq.
Harvard University-mi ilisimatusartut orpiit ipaasaat, tatsit naqqini qaleriissiternerit, Sermersuarmi qillerisarnikkut aamma qangaanerusoq kissassutsinik uuttortaasarsimanertigut nalinginnaasutigut misissuinermikkut taamatut angusaqarsimapput.
Nalunaarsukkat takutippaat »ukiuni kingullerni 600-ini aatsaat taamatut kiatsigisoq«.
- 2005, 2007, 2010 aamma 2011-imi aasat 1400 tikillugu aasaasartunit allanit tamanit kiannerusimasut nalunaarusiami allassimavoq.
- 2010-mi aasaq Ruslandip kippasissortaani immaqalu aamma nunatta Kitaani aamma Issittumi Canadami ukiuni 600-ini aatsaat taama kiatsigaaq.
Ukiuni kingullerni nunarsuaq tamarmi ukiut tamaasa kissakkaluttuinnarsimavoq.
Taamaalilluni Amerikami silaannarsualiartarnernut pisortaqarfimmi Nasami januaarimi 2012 USA-mi aatsaat taama kiatsigisimasoq uppernarsarneqarsinnaasimavoq.
Det Europæiske Miljøagenturimit (EEA) siusinnerusukkut silap annertuumik allanngornera Europami agguaqatigiissillugu kiassutsip ukiuni aggersuni 4 gradit tikillugit kiannerulertussaasoq mianersoqqussutigineqareersimavoq.
- Silap allanngornera nunarsuarmi tamami malugineqarsinnaavoq aamma allannguutit annertussusiat sukkassusiallu ersarissigaluttuinnarput, EEA-mi pisortaaneq, Jacqueline McGlade, siusinnerusukkut oqarsimavoq.