Nittartagaq kopeerisarfik nunatsinnut qimaasoq

Pirate Bayip serverii siusinnerusukkut Sverigemit USA-mut nuunneqarput politiinit arsaarinnissutigineqarsinnaanerat pinngitsoorniarlugu

Pirate Bay Kalaallit Nunaannut nunalippoq. Titartagaq: Pirate Bay

Nittartagaq nunarsuarmi kopeerisarfiit ilisimaneqarnersarigunaat Sverigemeersoq Pirate Bay malersorneqarnerminit aniguiniarluni allamik aallaavissarsiorsimavoq maannalu Kalaallit Nunaannut pisimalluni.

Taama Berlingskep nutaarsiassaqartitsivia, Berlingskes Nyhedsbureau, BNB, allappoq.

Pirate Bay nipilersukkanik, filminik, spilinik programminillu unioqqutitsilluni kopiikkanut isertarfittut ilisimaneqarlunilu tusaamanerlugaavoq, taamaattumillu nunarsuaq tamakkerlugu oqartussanit ukiorpassuanngortuni malersugarineqarsimalluni. Maannalu taakkua Danmarkimi oqartussanit niaqorluutigineqartussanngorput.

Tele Greenlandimi Kalaallit Nunaanni .gl-domænemik taamalu aamma Kalaallit Nunaanni internetadressinut tamanut aqutsisuusumi nalunaarsukkanik paasissutissat naapertorlugit thepiratebay.gl marsip qulingani 2011-mili pisiarineqareersimasoq aatsaallu apriilip qulingani 2013-imi atorneqalerluni. Pirate Bay atermik atuisinnaatitaanermik 2015-imi marsip 16-iata tungaanut akiliisimavoq.

Kalaallit Nunaanni adressi Tysklandimi suliffeqarfik aqqutigalugu pisiarineqarsimavoq, The Pirate Bayimilli pilersitseqataasut ilaat, Sverigemiu Fredrik Neij taassuminnga piginnittutut allaqqavoq, BNB allappoq.

Pirate Bay ukiup aallartinnerani maannamut .org-imit atorsimasaminit Sverigemiittumut .se-mut nuuppoq Amerikami oqartussanit .org-adressinik aqutsisuusunit qanoq iliuuseqarfigineqarnissaq pinngitsoorniarlugu.

Malersuineq
Maannali Pirate Bay ajornartorsiulerpoq, TorrentFreak naapertorlugu Sverigemi oqartussat ulloq arlaqanngitsut ingerlaneranni akuliullutik Sverigemi netadressemik arsaarinninnissaat naatsorsuutigineqarluni.

Matuneqarnissaq pinngitsoorniarlugu suut tamarmik Kalaallit Nunaanni adressemut maanna nuunneqartut BNB allappoq.

Pirate Bayip serverii tamarmik siusinnerusukkut Sverigemiit USA-mut nuunneqarput politiinit arsaarinnissutigineqarsinnaanerat pinngitsoorniarlugu, maannalu nittartagaq tassa aamma nuunneqarpoq.

Sermitsiaq.AG-mit apeqqutit ullup-qeqqata siornatigut akineqarsinnaanissaat Tele Greenlandimit naatsorsuutigineqarpoq.

Powered by Labrador CMS