Suliniutinut angisuunut inatsit amerlanerussuteqartunit tapersersorneqartoq
Suliniutinut angisuunut inatsisip nunatta siunissaanut pitsaasorujussuarmik imaluunniit pitsaasuunerusumik sunniuteqarnissaa nunatsinni innuttaasut 54 procentiinit isumaqarfigineqartoq HS Analysep misissuineranit nutaamit takutinneqarpoq
Suliniutinut angisuunut inatsit tapersersorneqarnersoq akerlerineqarnersorluunniit innuttaasut nalinginnaasut aperineqarmata nunatsinni innuttaasut affaannit amerlanerit tapersersuinerarput.
Tamanna HS Analysep Ugebrevet A4 sinnerlugu februaarimi marsimilu misissuinerani nutaami takutinneqarpoq.
Misissuineq naapertorlugu innuttaasut 54 procentii isumaqarput, suliniutinut angisuunut inatsit nunatta siunissaanut pitsaasorujussuarmik imaluunniit pitsaasuunerusumik sunniuteqassasoq.
Piviusorsiortuuvugut
Tamatuma assinganik innuttaasut affaasa missingi isumaqarput, suliniutinut angisuunut inatsit nunanillu allanit aningaasaliissutit nunatta aningaasaqarnikkut namminiilivinnissaanut tunngavissaasut.
Kalaallit Nunaata Aningaasaqarneranut Siunnersuisoqatigiit siulittaasuat, aningaasarsiornermi professori overvismandiusimasorlu Torben M. Andersen naapertorlugu, suliniutinut angisuunut inatsimmut atatillugu piviusorsiortuuvugut.
- Kalaallit namminiilivinnissamik sakkortuumik kissaateqarnerat misissuinermi takutinneqarpoq. Nalunngilaallu aatsitassat aatsitassarsiornerlu imminut napatittumik aningaasaqalernissamut tunngaavissatut iliimanaateqarnerpaasut, Ugebrevet A4-mut oqarpoq.
Kalaallit sinniisutut toqqartorneqartut 712-t akornanni misissuineq oqarasuaatikkut ingerlanneqarpoq.
Misissuineq pillugu annertunerusumik maani atuarit