Angerlarsimaffeqanngitsut iliuuseqarfiginiarneqalermata nuannaarutigaat
Peqatigiiffiup NoInip Siumut, Atassut Partiilu Inuit naalakkersuisuutitaqalersut Nuummi unnuisarfimmik pilersitsiniarmata nersualaarpai
– Nuannerluinnarpoq kiisami naalakkersuinermik suliallit inuit angerlarsimaffeqanngitsut ajornartorsiutaanerat isiginialersimammassuk.
Taama oqarpoq angerlarsimaffeqanngitsut peqatigiiffianni NoInimi siulittasoq Morten Christensen.
Taamaattumik oqariartuuteqarpoq naalakkersuutitaqalersut Siumut, Atassut Partiilu Inuit nalunaarmata Nuummi angerlarsimaffeqanngitsut unnuisarfissaannik pilersitsisoqassasoq.
– Unnuisarfeqalernissaa tikilluaqquarput. Neriuppugullu namminersorlutik oqartussat sulinerminni atuisut isumasiortassagaat init qanoq ittuunissaat sunillu atortoqarnissaat pillugu atuisussat ulluinnar- ni inuunerannut pitsaasumik, Morten Christensen oqarpoq.
Ullumikkut Kommuneqarfik Sermersooq Blok E-mi Café Kialaarfimmik ingerlatsisuuvoq tassani ulluunerani ataatsimoortoqartarluni kiisalu kommu- nimit siunnersorneqarluni. Aamma inissiarsuarmi tassani unnuisarfeqarpoq inunnut 25-t missaanniittunut unnuiffiusinnaasumik. Pisariaqartitsinerli annertuneroqaaq, Morten Christensen erseqqissaavoq.
– Nuummi angerlarsimaffeqanngivissut 40-t aamma 50-it missaaniittutut nalilerparput unnuiffissaminnik pisariaqartitsisut. Aamma nunatsinni allani taamaattumik ajornartorsiuteqarpoq, siulittasoq oqarpoq.
Unnuisarfissamik pilersaarutit marlunngornermi marsip 26-ani saqqummiunneqarput naalakkersuisunngortitsinermut atatillugu, naalakkersuisuutitaqalersut politikkikkut tunngavissartik ‘Nuna ataasiusoq – inuiaqatigiit ataasiusut’ saqqummiummassuk.
Ineqarnermut naalakkersuisunngortoq Miiti Lynge Partii Inuimeersoq pilersaarutit pillugit annertunerusumik oqaaseqarusunngilaq.
– Siusippallaaqaaq. Toqqagaaqqammerpugut suliassallu iserfiginiaqqaartussaallutigik, Miiti Lynge oqarpoq.
Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk: