Umiatsiaararsorlutik aalisartut putsumik tammartajaartut

Kujataani nunap immikkoortuani politiit Issittumi Sakkutooqarfimmiut, politiit angallataat, Sermersuumi nunap immikkoortuani politiit, Air Greenland aamma Tele Greenland suleqatigalugit akisoorujussuarmik iluatsilluartumilli inunnik pingasunik umiatsiartunik ujaasillutillu annaassiniarsimapput

2013-imi apriilip ulluisa aappaani nal. 18.46 Nanortalimmi politiit arnamit ernumasorujussuarmit uia puisinniarluni sikorsuarnukasimasumit saaffigineqarput.

Arnap uia angut allat peqaani nukappiararlu 14-inik ukiulik ilagalugit umiatsiaaqqamik aallarsimapput. Putsumik qoqassineqarsimallutik angerlarniartillutillu tammartajaalersimallutik orsussaarullutillu paasissutissiisimapput.

Annanniarnissamut, radiomik allanilluunniit ajornartorsiulermi atortunik umiatsiaminniititaqarsimanngillat avammullu attaveqaatituaat tassaasimavoq oqarasuaat angallattagaq.

Politiit angallataat Sisak III aamma umiarsuaq sinerissamik nakkutilliissut, Knud Rasmussen, tammartajaarfiusup nalaanut aallartinneqarput tassanngaanniillu aallaqqaammut umiarsuit atorlugit ujaasisoqalerput. Unnuap ingerlanerani maqaasineqartunik/ajornartorsiortunik oqarasuaatikkut attaveqartarsimapput taakkulu politiinut paasissutissiisimapput umiarsuit qinnguartaataat takusinnaasimagitik. Ujaasisulli ajornartorsiortut aallaqqaammut sumiissusersisinnaasimanngilaat.

Aqaguani ullaakkut nal. arfineq-marlunngulersoq ajornartorsiortut oqarasuaatikkut kingullermik attaveqarfigineqarput.

30 s/m-inik anorersuarnissaanik ilimasaarisoqarnera pissutigalugu aamma umiarsuarnik ujaasineq nal. ak. arfineq-pingasut missaannik sivisussuseqarsimanera eqqarsaatigalugu politiini annaassiniartartut aamma Issittumi Sakkutooqarfimmiut siunersioriarlugit qulimiguulik atorlugu ikiuuttoqassasoq aalajangerneqarpoq.

Nal. 10.00 qulimiguulik Qaqortuumiit politiinik ilaasoqarluni aallarpoq tamatumalu kingorna ujaasisoqalerpoq. Qulimiguulimmik angalaneq siulleq iluatsitsiffiunngilaq. Qulimiguulik aappaassannik aallarmat aamma nal. marluk missaanni ujaasisoqareermat maqaasineqartut Nanortallip kitaani 45 kilometerisut/24 sømil, avasitsigisumiittut imaannarmiittullu sumiissusersineqarput. Tamatuma nalaani anorlilersimavoq kisianni nal. ak. affaata missaa qaangiummat ajornartorsiortut politiit angallataannut ikineqarput Nanortaliliaanneqarlutillu.

Pingasuullutik tamarmik ajunngillat
Inuit kikkulluunniit angallammik aallalinnginnerminni eqqarsarluartarnissaannik politiinit kaammattorneqarusupput. Immut isumannaallisaaneq eqqarsaatigalugu pisariaqartinneqartunik ajornartorsiulernermi atortunik, aamma ajornartorsiulermi aallakaatsissummik, pisisoqartariaqarpoq, tassami 2.000 koruunit missaannik aningaasartuuteqarneq nassaarineqarnissamut nassaarineqannginissamulluunniit aalajangiisuusinnaammata.

- Ajornartorsiortut GPS-mik nassarsimagaluarpata ujaasisoqarsimassanngikkaluarpoq, tassami ajornartorsiortut namminneerlutik angerlamut apuussiumasinnaagaluaramik imaluunniit sumiiffitsik umiarsuarnut ujaasisunut nalunaarutigisimasinnaagaluarmassuk tamatumalu kingorna umiarsuit arlaannit toqqaannartumik angerlaanneqarsinnaasimagaluarlutik. VHF radiomik peqartoqarsimagaluarpat aamma ajornartorsiortut sumiiffiat politiinit nassaariuminarnerusimassagaluarpoq taamaalillutillu ajornartorsiortut sukkanerusumik nassaarineqarsimassagaluarput, Carl Sværd, Kalaallit Nunaanni politiini annaassiniartartuni pisortaagallartoq oqarpoq.

Powered by Labrador CMS