Bamsit kisinneqaleqaat

Pinngortitaleriffimmi ilisimatusartut Qimusseriarsuarmi nannunik misissuissapput. Misissuinerisa inerneri sumiiffimmi nanoqassutsimik naatsorsuinermi atorneqassapput

Erik W. Born aamma Kristin Laidre (Pinngortitaleriffik) nannumik arnavissamik satellit-ikkut nassitsissummik ikkussileruttortut. Foto: K.Laidre.

Kitaani nannut apriilip 19-iata tungaanut ilisimatusartut pisortaannit Erik W. Born aamma Kristin Laidremit Pinngortitaleriffimmeersumit tikeraarneqassapput.

Tamanna aallaaveqarpoq Qimusseriarsuarmi nannut amerlassusaannik paasisaqarusunnermik aallaaveqarpoq.

Kisitsinerup saniatigut Pinngortitaleriffimmit amernik misissugassat katersorneqassapput. 2013-imi misissuinerit ukiuni pingasunik misissuinerit kingullersaat ingerlanneqassaaq, 2011-mi 2012-imilu amernik aamma katersisoqarnikuuvoq. 2011-mi Nunavumi aamma Nunatsinni ilisimatusartut nannut ilisimajunnaartinneqarsimanngitsut amiannit misissugassanik 427-nik katersineq. 2012-imi misissugassat katersat 734-t iluatsinneqarlutik.

Qulimiguulik atorlugu takusanik kisitsisoqassaaq ukiunili aggersuni kisitsisit qulakkeerumallugit, nannut ilaat satellitsikkut nassitsissummik siutaasigut kappussivigineqassapput.

Nanoq qulimiguulik atorlugu nassaarineqaraangat qarsuusatut ilusilimmik mikisunnguamik nuluagut aallaaneqartassaaq. Nanoq pangaliinnartarmat qarsuusaq ingerlaannaq katattarpoq. Qarsuusaq nanormut kappukkaangami nannup amianit misissugassamik pissarsivigineqartarpoq, taannalu nannup kingornuttakkatigut sananeqaataanik, DNA-vanik, misissugassamik pissarsivigineqartarpoq. Nannup DNA-vanik ilisimasaqarneq iluaqutigalugu nannut amerlassusiat naatsorsorneqarsinnaasarpoq. Kisitsit pissarsiarineqartoq piujuaannartitsinermik tunngaveqartumik nannunniarsinnaaneq pillugu siunnersuinermut atorneqassaaq, tassani nannut nunatsinneersunit Canadameersunillu piniarneqartartut pineqarlutik.

Suliaqarnermi anguniarneqartoq alla tassaavoq nannut arnavissat qulit qaammataasanut nassitsissutinik qungasequsersorneqarnissaat aammalu angutivissat inuusunnerumaartullu katillugit qulit siutaasigut mikinerusunik nassitsissusersorneqarnissaat. Nannut qulimiguulik atorlugu nassaareriarlugit ilisimajunnaartitsissummik nuluisigut aallaaneqartassapput. Nannup 5-10 min.ingerlareernerini ilisimajunnaareernerani ilisimatusartartut misissugassanik katersaqartassapput, soorlu meqquinit, orsumininnguamik, aavanik kiisalu tuloriaata tunuaniittumik kigutaaraanik peersisassapput. Nannup nalunaaquttap akunneri marlussunnguit ilisimajunnaaqqareerluni pissutsini ateqqittarpaa.

Taavani nannut aamma ukiuni 2010-2012 nalunaaqutsersorneqarnikuupput. Paasissutissat qaammataasatigoortumik pissarsiarineqartartut iluaqutigalugit aamma imaani sikuusarnerata allanngoriartornerata kinguneri paasisaqarfiginiarneqartarput soorlu aamma Kalaallit Nunaata kitaata avannaani uuliasiorsinnaanissamik pilersaaruteqarnerit kingunerisinnaasaasa paasisaqarfigineqarnerunissaat anguniarneqartoq. Ilisimatusartartut Pinngortitaleriffimmeersut piffissami aggersumi Kullorsuarmiit Air Greenlandip qulimiguua atorlugu nannunik ujartuisassapput. Ilisimatusartartut misilittagartuujupput nannut untritillit arlerlugit nalunaaqutsersoreernikuullugit.


Powered by Labrador CMS