Binzerip Tele-Post taamaatippaa
Inussuutissarsiornikkut aqutsisoq piffissaq kingullerpaaq atorlugu peqqissimivoq
Nunatsinni inuussutissarsiornikkut aqutsisut ilisimaneqarnerpaat ilaat Michael Binzer ullumi apriilip aallaqqaataani Tele-Postimi pisortaanertut sulilersussaagaluarpoq. Aallartiffissaminili peqqissimagunarpoq.
– Eqqarsaatiginerujartortillugu Air Greenlandip qimannissaa eqqunngitsutut misinnarpoq. Aamma oqarasuaatikkut oqaluusernissaa nakerinngilara. Nammineq nuannarinngisaq tuniniarneqarsinnaanngilaq, Michael Binzer oqarpoq suliallu ingerlasimanera soqutiginagu timmisartuutileqatigiinni pisortaanertut suliinnarniarluni.
Taamaalilluni nalunaarasuartaateqarnikkut suliffeqarfik aappassaa pisortassaaruppoq.
Siorna juulip 1-ani DSB-mi pisortaanerusimasoq Søren Eriksen Tele-Postimi pisortaaninngortussaagaluarpoq. Imminullu tunngasunik peqquteqarluni atorfininnani.
Namminersorlutik oqartussat suliffeqarfiutaa Agner Mark eqqissisimavoq.
– 2012-mi aatsaat taama sinneqartoortigaagut, naak pisortaqanngikkaluarluta. Piffissallu ingerlanerani qularutigiunnaariartorpara pisortaaneqarnata ajunnginnerussasoq. Sullitavut sinaertarput ullullu tamaasa interneterlutik. Aningaasallu isaaginnarput pisortaqarutta pisortaqanngikkuttaluunniit, Agner Mark oqarpoq.