Taamaammat Vega ikkarlippoq
Imaatigut ajutoornermi nassuiaasartut siorna aggustimi Vega Saggittaariusip Nuuk eqqaani ikkarlinneranut atatillugu nalunaarusiorsimapput. Umiarsuarmi ilisimasortaq taperpia tungaani ikkarloqarneranik ilimasaarivoq - sikulli isiginiarneqarsimapput
Silagippoq anoreqanngingajalluni angallattoqaranilu. Isikkivigillunilu ajortoqanngilaq Vega Saggittarius aggustip 16-ani ullaakkut Nuup Kangerlua kujaqqullugu Aasiannut aallarmat. Nuup avatinnguani 17 knobimik sukkassuteqarpoq.
Umiarsuarmiiipput inuit 17-it tamarmik ukiunik arlalinnik misilittagaqartut taamaattoq arlaannaalluunniit Kalaallit Nunaata imartaani umiartornermik misilittagaqarani. Taamaattumik umiarsuup naalagaa sinerissap qanittuani taamaallaat ulluunerani angalaniarpoq. Taamaattumillu aamma ilisimasortumik pissarsisimavoq isumannaatsumik ingerlanissaq siunertaralugu. Ullukkut Nuummut tikipput, ullukkullu Nuummiit aallartoqarlutik.
Nuummiit aallartinnai sikut eqqartorneqarput aqqutaaniisinnaasut, taamaattumillu aalajangerneqarluni Nuup Kangerluaniit 240 gradinik kujammut kimmut ingerlasoqassasoq, Taannalu 247-nut allanngortinneqarpoq imaani sikut takuneqarmata. Sangunermigut umiarsuaq ikkarlimmut ingerlaannarpoq. Umiarsuummi aqunneqarnera nammineerluni aqunneraniit automatiskimut nuutinneqarpoq.
Vega Sagittarisup ikkarlinneranut atatillugu ajutoornermut nalunaarusiami 17-inik qupperneqartumi taama allassimavoq. Taanna Nuummiit akunnerup ataatsimip missaani ingerlereerluni ikkarlippoq. Ikkarlunneq minutsialunnik sioqqutilaarlugu ilisimasortap aquttarfik qimallugu ullaakkorsioriartorpoq, nalunaarusiamili allassimavoq ajutoorneq sioqqutitsiarlugu nalunaaqutaq 08.19 taperliup tungaani 4 gradimiittoq takuneqarpoq, naalakkallu ilaat majuartarfimmi naapikkamiuk oqarfigaa:
- Talerpimmut sangoqqittoqassanngilaq.
Taamaakkaluartoq aqumiut sikut ingerlaffissaminniittut takuaat. Umiarsuaq sajuppillappoq isumaqarpullu sikumut aportoqartoq, uffami ikkarlimmut toraarsimallutik. Tassalu nalunaaqutaq 8.20.
Læs også: Containerskib grundstødt
Imaatigut ajutoornerni naliliisartut nalunaarusiaminni imatut inernilerpaat ajotoorneq pisoq inuit kukkuluttornerisigut. Aquttarfimmi attaveqatigiinneq pitsaanerpaajusimanngilaq. 240 gradeniit 247-mut sanguneq immap assinganut ikkunneqarpoq, sangunermilu navianartoqarsinnaaneranik aquttoq nalunaarfigineqanngilaq. Suut tamarmik pissusissamisoortutut isikkoqarput. Ilisimasortallu ikkarleqarneranik nalunaarutitaa aquttumut ersarissumik apuunngeqanngilaq. Naliliisartut aamma maluginiaqquaat ilisimasortap qanoq inissisimanera imaluunniit inissinneqannginnera pitsaanngitsuusoq. Aqumiunut ilaatinneqanngilaq. Siunnersuisutut inissinneqarpoq. Taamaattumik Kalaallit Nunaata imertaani imaatigut angalaarnermi ilisimasai tamakkiisumik atorneqanngillat.
Nalunaarusiami aamma allassimavoq Kalaallit Nunaata imartaani angalanermi pissutsit immikkut ittuunerat soqutigineqarsimanngitsoq.
Vega Sagittarius aggustip 29-ani 2012 ikkarlimmit kaanngartinneqarpoq.