Sisamassaanik Sermersuaq qarsullugu

Misigisassarsiorumatooq, angalatitsisoq, oqalugiartartoq atuakkiortorlu Erik B. Jørgensen sermersuaq qarsullugu pisunniarluni inaarutaasumik piareersaasiorpoq.

Ataasinngorpat Erik B. Jørgensen Kangerlussualiassaaq sapaatip akunnerata naanerani, sermersuakkut ilisimasassarsiortuni peqataanissaminut piareersaatit naammassiniarlugit. Angalaqatigiittussat qulingiluaapput. Angutit arfinilli arnallu pingasut, 27-niit 62-inut ukioqartut. Sisamassaanik Erik B. Jørgensenip sermersuaq ikaassavaa pingajussaanik peqateqarluni. t

Erik B. Jørgensenip suliffeqarfiutaatalu ilaatigut sermersuakkut ilisimasassarsiornerit tuniniartarpai. Peqataasussat qulingiluat siorna septembarip aallaqqaataa tikitsinnagu nalunaartussaapput taamanikkullu tunaartalimmik sungiusarlutik, sapaatip akunneranut akunnerni 10-20-ni suna sungiusarneqarnersoq apeqqutaatillugu. Peqataasussanit pingasut nunatsinni najugaqarput.

- Eqqaamassavarput ilisimasassarsiornerummat allatuulli angalanerunani, Erik B. Jørgensen Sermitsiaq.AG-mut erseqqissaavoq Fynimi Langeskovimi illuani pulaarnermi ilaquttanilu najugaqarfigisaani. Illumi takuneqarsinnaapput angut imaannaanngitsoq tassani najugaqartoq. Ilisimasassarsiornerpassuinit assit iikkaniipput. Sungiusarnermi atortorpassuupput. Tilluutnnermut atortoq nivingavoq ineeqqallu ilaanniipput atortussai poortorneqartut biilillu inissiiviani qajaq nivingalluni.

- Peqataasussat Kangerlussuarmi katersuuppata isumannaallisaanermik pikkorissassaagut. Issittumi qanoq pissuseqarnissaq sungiusassavarput persileriataarpallu toqqillu teqqalerlutik qanoq iliornissaq sungiusarlugu, minnerunngitsumillu peqataasut tamarmik poortueqataassallutik.

Apriilip 15-ani sermimut
Soorunami arlalinnik akuersissuteqassaagut, aningaasatigut sillimmasiissuta annaassinniartoqarnissaanullu pilersaarusiorluta. Ilisimasassarsiorneq apriilip 15-ani sermimut pissaaq. Ulloq taanna sioqqunneqaqqusaanngilaq, Erik B. Jørgenseni oqarpoq nangillunilu:

- Aqqut atorneqartuartartoq ingerlaffigissavarput. Kangerlussuarmi aallartissaagut ullormut 20-20 kilometerit pisuttarluta Tunumilu Isortumut tikissalluta maajip 10-12-ani. Angalaneq namminermini 60.000 koruuneqarpoq saniatigullu aamma atortunut assigiinngitsunut 20.000-niit 40.000 koruuninut aningaasartuuteqassalluni. Apriilimi sermersuaqmi 20-25-nik ississasoq naatsorsuutigineqassaaq.

CV imartooq
Erik B. Jørgensenip CV-ani ilaatigut allassimavoq:
1975-mi inunngortoq, Livgardenenimi Siriusimilu sakkutuujusimasoq kiisalu Jægerkorpsemi, arlaleriarluni Irakimut Afghanistanimullu aallartitaasarsimalluni, sisamariarluni Sermersuaq ikaarsimallugu, Thule-Thule-mi ilisimasassarsiorsimalluni, qaannamik Danmark kaajallassimallugu, ulluni 175-ini Skandinavien qaannamik kaajallassimallugu, kajumissaarineq, suleqatigiinneq, suleqatigiinnik aqutsineq aaqqiagiinngissutillu aaqqinnissaannut oqalugiartarluni atuakkanillu marlunnik atuakkiorsimalluni. Soorlu Oplevelser i ukendt land (Nunami ilisimanngisami - Knud Rasmussenip Thule -Thulemi ilisimasassarsiornera tumisiorlugu).

Erik B. Jørgensenip suut tamaasa oqariartaammut ataatsimut katissimavai:

- Misigisassat naatsiivinni aallartissinnaapput.