Suliniutinut angisuunut inatsit nutaaq aatsaat 2014-imi atuutilersinnaavoq
Suliniutinut angisuunut inatsimmik nutarterineq sivisusinnaavoq, aningaasaleerusussuserlu unikaallatsinneqaratarsinnaalluni, inatsisilerituut naliliipput
Suliniutinut angisuunut inatsisip akerleriissutaasup decembarimi Inatsisartuni tuaviuutipilunneqartup allanngortinneqarnissaanik Siumut Naalakkersuisullu sinneri ilimasaaruteqarput.
Suliffeqarfissuit nunanit allaneersut sulisartunik aningaasarsiakitsuararsuarnik tuusintilikkuutaanik atorfinitsitsinissamut periarfissinneqarnerisigut inatsisip inuiaqatigiinnut qanoq sunniuteqarsinnaanissaa Siumumit ilaatigut ernummatigineqarpoq.
Taamaattumik suliniutinut angisuunut inatsit nutarterneqassaaq, tamannalu Kalaallit Nunaanni siunissaq pillugu nalornisoornermik pilersitseqqittoq Information allappoq.
Tassami inatsit nutaat nutarterneqarsimasorlu aatsaat 2014-ip aallartinnerani naammassineqarsinnaavoq, Kalaallit Nunaanni inatsisilerituut aviisimit oqaloqatigineqarsimasut oqarput.
- Aningaasaleerusussutsimik unikaallatsitsissagunarpoq, Kalaallit Nunaanni eqqartuussissuserisut peqatigiiffiannut siulittaasoq Nuna Advokaterinilu piginneqataasoq Peter Schriver oqarpoq.
Taanna isumaqarpoq sukkasuumik sulisoqaraluarpalluunniit inatsisissamik nutaamik Inatsisartuni suliaqarneq aatsaat ukiaru aallartissinnaassasoq.
- Suligasuartoqarpat siunnersuut tusarniaatigineqariarluni oktobarimi novembarimilu ukiakkut ataatsimiinnissamut piareersinnaavaat. Kisianni inatsimmik taamatut suliaqarneq aamma sukkavallaartussatut isumaqarpasippoq, Peter Schriver Informationimut oqarpoq.
Naliliinermut tamatumunnga Anders Meilvang, Ina Nunami eqqartuussissuserisuunermi saniatigut Transparency Greenlandimut siulittaasuusoq, isumaqataavoq.
- Inatsisissatut siunnersuut Danmarkimisut saqqummiuteqqaarneqarlunilu pingasoriarluni oqaluuserineqartussaavoq. Inatsit nutaaq taamaattumik siusinnerpaamik aatsaat ukiaru oqaluuserineqarsinnaavoq aappaagulu januaarip aallaqqaataani aatsaat atuutilerluni, Anders Meilvang oqarpoq.
Suliniutinut angisuunut inatsisip tuaviuutipilunneqarsimaneranik Siumup isornartorsiuisimanera tikkuarpaa, taamaattumillu inatsisissap pisortatigoortumik oqaluuserineqarnissaanut piffissamik atuingaatsiartoqarnissaa ilimagisariaqarluni.