Pisortaq tunuarpoq
Ineqarnermut, Attaveqarnermut Angallannermullu Naalakkersuisoqarfimmi pisortaq naalakkersuisooqatigiilersunut tulluussorinnginnami atorfimminit tunuarpoq
Ineqarnermut Naalakkersuisunngortoq Mette Lynge Partii Inuit-neersoq suliassami siulliit ilaattut naalakkersuisoqarfimmini pisortassarsiortussanngorpoq. Steffen Ulrich-Lynge atorfimminit tunuarniarluni aalajangerpoq.
Steffen Ulrich-Lynge isumaqarpoq Naalakkersuisooqatigiilersunik sullissisussatut tulluarani
- Naalakkersuisup aamma Naalakkersuisoqarfimmi pisortap suleqatigiilluarsinnaanerat apeqqutaasorujussuuvoq politikkikkut anguniakkat angunissaannut. Nalunngeqatiginnissusera malillugu pissutsini nutaani siunnersuisinnaanissara ilimaginngilara, Steffen Ulrich-Lynge nalunaarpoq.
Naalakkersuisut nutaat apriilip tallimaani inissippata nikisitertoqartussaavoq. Attaveqarnermut immikkoortoqarfik peqqinnissamut Naalakkersuisoqarfimmiilissaaq Atassummeersoq Steen Lynge Naalakkersuisoralugu. Ineqarnermut oqartussaaffik nunamut namminermut oqartussaqarfimmiissimagaluarpoq. Taanna Partii Inuinneersoq Mette Lynge Naalakkersuisoralugu ineqarnermut naalakkersuisoqarfimmiilissaaq.
Taamatullu allanngortiterineq Steffen Ulrich-Lyngep soraarneranut pissutaaqataavoq.