Imaaliornikkut patinnik tunisisartunngorsinnaavutit
Uani atuaruk qanoq iliorlutit Kalaallit Nunaanni patermik tunisisartunngorsinnaanerlutit
Sermitsiaq.AG-mit piffissami sivisuumi kræftimik napparsimasoq 22-nik ukiulik Nini Tessing, Qaqortumeersoq malinnaaffigineqarpoq. Sapaatip-akunnerata ingerlanerani siusinnerusukkut allaaseraarput Københavnimi Rigshospitalimi nakorsat patermik Ninimut atorneqarsinnaasumik ujaasillutik aallartinnerat, pissutigalugu Nini sisamassaanik leukæmimik (aakkut kræfteqarneq) eqqorneqarsimammat.
Nakorsanit ujarneqarpoq inuk Ninimut assingusumik timip ipiutaasartaanik pilik, qallunaamit kalaallimillu kingoqqisoq. Piffissaagallartillugu patermik tunisisinnaasumik nassaartoqanngippat annaanaasup Sara Tessingip ajornerpaamik pisoqarsinnaanera annilaanngatigaa, taamaattumik innuttaasunut kalaallimit qallunaamillu kingoqqisunut ilungersorluni kaammattuuteqarpoq patermik tunisisartunngoqqullugit.
Maannakkut nunatsinni peqqinnissaqarfimmi pisortat aaqqissuisoqarfiup saaffiginnissutaanut qisuariarnissaminnut periarfissinneqarput, nunatsinni innuttaasunut patermillu tunisisartunngorusullutik kissaateqartunut nassuiaassinissamut.
- Patinnik tunisisartunngorniaruit 18-ileereersimassaatit peqqissuullutillu. Nunarsuaq tamakkerlugu patinik tunisisartut nalunaarsorsimaffiannut nalunaarneqarnissat piareersimaffigissavat, Rigshospitalimullu patinnik tunisiartorlutit angalanissat sillimaffigissallugu, peqqinnissaqarfimmi pisortaagallartoq Anders Læsøe, Peqqissutsimut aamma Pinaveersaatitsinermut aqutsisoqarfimmit ilisimatitsivoq.
Taassuma oqaatsit makku atorpai paternik tunisisartunngornissamut innersuutitut:
'Patinnik tunisisartunngorniarlutit nalunaarniaruit aalersuutissamik aaversitartunngorniarlutit nalunaaqqaassaatit. Pateq atorneqarsinnaassappat paterminnik tunisisut nappateqannginnissaannut piumasaqaateqarneq, tamatumunnga tunngaviuvoq. Aalersuutissanik aaversittartut HIV-mut tingulluummut Hepatitis-imut assigisaannullu misissortikulasuupput.
Illoqarfinni tallimani taamaallaat periarfissaavoq
Paterminik tunisisup aaversinneraniit piffissaq aalajangersimasoq qaangiutsinnagu Rigshospitalimi misissorneqarnissaa piumasaqaataavoq. Taamaammat innuttaasut illoqarfinnit aaviisarfilinnersut tassalu Ilulissaneersut, Aasianneerut, Sisimiuneersut, Nuummeersut Qaqortumeersullu kisimik, paterminnik tunisisartunngorniarlutik nalunaarsinnaapput.
Patinnik tunisisartunngorniarlutit nalunaarniaruit, Rigshospitalimi nunarsuaq tamakkerlugu paterminnik tunisisartut nalunaarsuiffiannut: Bone Marrow Donors Worldwide (www.bmdw.org)-imut ilaasumut ilanngunneqassaatit. Nalunaarsuiffimmi ullumikkut paterminnik tunisisartut 21 millionit nalunaarsimapput, tassanngalu kalaallit patilersinnissamik pisariaqartitsisut pissarsisarput
Timip ipiusartai imminnut assigiissuteqassapput
Patermik tunisisartutut illit patit nunarsuarmi sumiluunniit atorneqarsinnaassaaq. Illit inuttut sananeqaativit immikkoorutai ass. Italiamiup pisariaqartitaanut naapertuuppata, Rigshospitalimut aggersarneqassaatit, tassani patinnik peersissapput Italiamullu nassiussillutik. Peqqinnissaqarfiup naatsorsuutigisaa naapertorlugu, ukiut qulikkaat ingerlanerini, kalaallinik patermik tunisisinnaasunik pisariaqartitsineq annikitsuinnaassaaq’.
- Patermik tunisisartunngorniaraanni qanoq kinguneqarnissaa siuningaaniit paasiniaavigissallugu pingaaruteqarpoq, Anders Læsøe oqaluttuarpoq nangilluni eqqaavaa peqqinnissaqarfimmi maluginiarneqarsimasoq patermik tunisisartunngorusuttut amerliartornerat.
Attaviit ataaniittut atorlugit paasissutissat pissarsiarisinnaavatit:
Sermitsiaq.AG'-mi Nini Tessing pillugu allaatigisat allat takukkit