Partii Inuit uran pillugu isumartik allanngortippaat

Naalakkersuisooqataaniaraanni imaannaanngitsunik iisisariaqartarpoq. Partii Inuit nittartagaat naapertorlugu uranimut akerliupput. Taamaakkunnaarpulli. Tamanna erserpoq naalakkersuisooqatigiilerniarluni isumaqatigiinniarnissat nalunaarutigineqarmata.

Partii Inuit nittartakkaminni imatut allapput: ”Uran nunatsinni akueringilarput” anguniakkallu allassimaffianni aamma imatut allallutik: ”Aatsitassat allat tamaasa piiarneqarsinnaaneri ammaffigaarput uran-mik akoqanngippata”.
Maannali Nunatsinni partiit nutaanersaat pilersinneqarnerminit qaammatit marlunngulersut allamik isumataarpoq.

- Uranimut naaggaarluinnarsimanerup atorunnaarsinnissaa peqataaffiginiarparput tassanilu aatsitassani qallorneqartuni uranimik akugineqartup annerpaaffilernissaa inissinniarlugu, Partii Inuit siulittaasuat Nikku Olsen naalakkersuisunngortitsilerneq pillugu marlunngornermi ualikkut tusagassiortunik katersortitsinermi taama oqarpoq.

Killinga inississavaat
Siumut aamma Atassut qineqqusaarnermi erseqqissumik nalunaarput uranimut naaggarluinnarnerup atorunnaarsinnissaa anguniarlugu. Illuanilli Partii Inuit Narsarmiut eqqarsaatigalugit isumakulupput aatsitassarsiorfiginiarneqartup uranimik akoqartup eqqannguaniimmat. Naalakkersuisunngortitsinissamili uranimut naaggarluinnarsimaneq atorunnaarsinniarneqartussanngorpoq.

Maannalu Nikku Olsen uranimut naaggaartorpallaarunnaarpoq.

- Uran pillugu partiitsinni erseqqissumik isummernikuunngilagut. Maanna tassa paaseqatigiiffiusumik isumaqatigiissusiortussanngorpugut aamma qularinngilara pitsaasumik isumaqatigiissusiorumaartugut, Nikku Olsen oqarpoq.