Ornittakkamiit katersuuffimmut
Tamassa nutaamik periaaseqarluni Aalborgimi tikilluaqqusiavoq. Katersuuffiup nutaap ornittagaq Perput taarserpaa
Aalborgimi kalaallit ornittagaat Perput ukiut nikinneranni matusariaqarsimavoq, qujanartumilli Socialministeriamit immikkut pisariaqartitsisunut aningaasaliissutit peqqutigalugit Aalborgimi Kalaallit Illuutaata orinittagaq ammaqqissinnaavaat.
Maannakkut taaguuteqalerpoq Tamassa Perpup inikuaniilluni tassalu Aalborgip qeqqani Slotsgade 35.
Periuseq
Tamassali Perpumit allaanerussaaq. Perput kalaallit ornittagaraat, Tamassalu katersuuttarfiussaaq, suliniummi aqutsisunngortoq Stina Nikolajsen oqarpoq. Katersuuttarfiussaaq kalaallinut illoqarfimmi najugaqartunut ilinniartunut tikerlaanullu kiisalu allanut Kalaallit Nunaannik soqutiginnittunut sammisaqafiulluni.
Perpumut orniguttartut suli tikilluaqqusaapput, Stine Nicolajsen oqarpoq.
Iganissamulli periarfissaqarunnaarpoq.
Stine Nicolajsenip nuannaarutigaa ilaannikkut boor'lunik qalarlaanik sassaalliisinnaanissani. Inuit sammisassanik neqeroorfigineqassapput inuiaqatigiinni Danmarkimiinnermik oqinnerulersitsisussanik. Danmarkimi sulisartut peqatigiiffii, sulinermi pissutsit isumaginninnikkullu pissutsit pillugit paasissutissiisoqartassaaq. Suliffeqarfinnut pulaarnerit oqalugiartitsinerillu Tamassami aamma pilersaarutaapput. Aamma Linfjorden qanittumiittoq sinerlugu pisuttuartoqartassaaq.
Neriuutigaa atasinnaanissaa
Pisortat innuttaasullu akunnerminni attaveqatigiinnerat internet atorlugu ingerlanneqartarpoq. Tamassami qarasaasiaqassaaq atorneqarsinnaasunik internetimut aqqutilinnik printereqartunillu. Taakkulu ilinniartunit allanillu torneqarsinnaassapput. Suliassatik naqissinnaassavaat aningaaserivinnut attaveqarlutik allatulluunniit.
Maannamut ukiumi ataatsimi Socialministeriamit aningaasaliisoqarpoq taamaalilluni Aalborgimi Tamassa ammarneqarluni. Aalborgimi Kalaallit Illuutaani pisortap Jan Thrysøep neriuutigeqaa aaqqissuussineq ataavartuussasoq taamaalilluni nalornisoqarani ukiumullu qinnuteqartarunnaarluni, ataavartumik eqqissillutillu sulisinnaallutik.