Kalaalerpalunnerusunik kalaalimineerniarfeqarnissaa kissaatigaat
Innuttaasunit kissaataavoq annertooq kalaallimineerniarfinnut maleruagassat allanngortinneqarnissaat taamaalilluni pilianik pisisoqarsinnaalluni
Inuppassuit kalaalimerngit pisiassaasut ikippallaarnerat kipiluttunaraat, amerlanerusunillu pisisinnaanissamut maleruagassat allanngortequllugit.
Taama nalunaarput Atuisartut siunnersuisooqatigiini, sinerissami atuisartunut ataatsimiititaliat Atuisorlu, kalaalliminernik amerlanerusunik kalaallimineerniarfinni pisisoqarsinnaalernissaanik inunnit saaffigineqallartaartarkutik.
- Pingaartumik kalaalimineerniarfinni kalaaliminernik assigiinngitsunik amerlanerusunik qinigassaqarsinnaanissaq ilaatigut pilianik, soorlu aalisakkanik pujuukkanik pisiassaqarsinnaaneq atuisunit ujartorneqarpoq. Saaffiginnissutilli amerlaqisut pisiniarfinni kalaalimerngit qinigassat assigiinngitsut ikippallaartarnerannut tunngasuupput.
- Taamaammat Atuisartunut Siunnersuisoqatigiit ataatsimiinnerni kingullerni tamanna aamma annertuumik sammivaat. qanoq iliuuseqarsimasinnaanitta erseqqissaaviginissaa taamaasillutalu kalaalimineerniarfinni pisiniarfinnilu kalaalimerngit qinigassat amerlisinnaanissaannut periarfissat annertusinissaat, eqeersimaartumik oqallisigaarput, atuisartut siunnersuisooqatigiivini siulittaasoq Rigmor Th. Høegh oqarpoq.
Inuussutissat pillugit inatsit ullumikkut atuuttoq naapertorlugu inuussutissanik pilineq inerteqqutaavoq. Kalaalimineerniarfimmi tuniniagassanik erisarsinnaaneq, errortuisinnaaneq uullisinnaanerlu inatsimmi periarfissatuaavoq. Taamaasillutik kalaalimineerniarfiit ataasiakkaat pilinissamut, soorlu pujoorinissamut aalisakkanillu panertulinissamut priarfissaqanngillat
Inuussutissat pillugit nutaamik inatsisitaarnissaq kajumissaarutigaat
Taamaammat Atuisartunut Siunnersuisoqatigiit- Aalisarnermut, Piniarnermut Nunalerinermullu Naalakkersuisoqarfiup inuussutissalerinermut immikkoortortaqarfiani, inuussutissat pillugit inatsit nutarterneqarluni aallartinneqarsimasoq tusaramikku- qiimmatsaqaat
- Inatsisip nutarterneqarnissaa sioqqullugu kalaalimerngit pileriikkat suut kalaalimineerniarfinni pisiniarfinnilu tuniniassallugit tulluartuunersut paasiniassallugit periarfissaqassaaq. Taama sioqqutsilluni paasiniaaneq inuussutissat pillugit inatsisissap nutaap qanoq iluseqartariaqarnissaanut innersuussinissamut tunngavissiisinnaassaaq, Rigmor Th. Høegh tusagassiuutinut nalunaarummi nassuiaavoq.
- Isumaga naapertorlugu inuussutissatigut isumannaallisaanermi isuma akiginagu, kalaalimerngit suut qularnaatsumik pilineqarlutillu tunineqarsinnaasut paasinissaat pingaaruteqarpoq. Taamaammat Naalakkersuisunngortussat, atuisut kissaataat malillugit inuussutissat pillugit inatsimmik nutaamik suliaqarneq nangeqqissagaat neriuutigaara.