Kikkut naalakkersuisunik pilersitsissappat?
Naalakkersuisunngortitsiniarluni isumaqatigiinniarnerit suli ingerlapput. Illilli kikkut naalakkersuisunngortitsissanersut kissaatigaajuk?
Ataasinngornermi ullaakkut nal. 10 Siumut aamma Atassut naalakkersuisunngortitsiniarluni isumaqatigiinniarnerit aallarteqqippaat, Siumut Aleqa Hammondimik aqutsiseqarlutik marlunngornermi Inuit Ataqatigiinnik aamma Partii Inuit-nik ataatsimeeqateqaqqinnissaat sioqqullugu.
Siumup ataatsimeeqateqaqattaarnitik naalakkersuisunngortitsiniarluni ataatsimiinnertut taanngikkaluarpaat, qularutigineqassanngilarli maannakkut partiit paasisussaammasuk naalakkersuisooqatigiinnik pilersitsinissamut kajumissuseqarnerlutik aamma piviusunngortitsisinnaanerlutik. Naalakkersuisunngortussat sapaatip-akunnerani uani tullianiluunniit saqqummiunneqassapput.
Siumut aamma Demokraatit ataasiarlutik ataatsimiikkamik isumaqatigiinniarnitik kingulleqqinniarnagit aalajangiuppaat.
Apeqquterput tassaavoq illit partiit sorliit naalakkersuisooqatigiilernissaat kissaatiginerit? Naqqani taasisitsinerput peqataaffigiuk - isummersorfissami tunngavilersorit.
Juunip aappaanni 2009 Inatsisartunut qinersinerup kingorna Naalakkersuisunngortut tassaapput Inuit Ataqatigiit, Demokraterne aamma Kattusseqatigiit Partiiat juunip qulinganni naalakkersuisunngortitsipput qinersinerup kingorna ullut arfineq-pingasut qaangiummata.
Tassa Inatsisartunut aamma Naalakkersuisunut inatsit Inatsisartut Suleriaasiat naapertorlugu - Inatsisartut nutaat sukkanerpaamik ataatsimiissinneqarnissaat piumasarineqarpoq kingusinnerpaamik qinersinerup kingorna ullut 45-t. Siullertulli Naalakkersuisunngortitsinissami isumaqatigiissutissaq naammassineqaqqaarsimassaaq.