Kaospilotit pingasut Kalaallit Nunaannukarusupput
Kaospilotit pingasut Aarhusimeersut Kalaallit Nunaanni sullitassaminnik ujaasinertik ilungersuuppaat - akeqanngitsumik illuatungiliuttuusinnaanertik neqeroorutigaat
- 2. semester ingerlapparput, tassani sammivavut Business Development, Kalaallit Nunaanni piorsarsimassuseq, nunap sananeqaataa aamma inuussutissarsiornermi unammilligassartai assut soqutiginartippavut. Upperaarput suliffeqarfinnut suliniutinullu allatut isiginnittaatsimik suleriutsimillu pitsaasumik sunniuteqarsinnaalluta.
Taama oqaluttuarput Sasja, Olivia aamma Morten ukioq siulleq KaosPiloternemi ilinniartut. Ilinniagaq taanna Aarhusimi ingerlanneqartarpoq. Piffissami matumani nunatsinni suliffeqarfimmik suleqatissarsisinnaanermut periarfissarsiorput. Suleriaaseq tassaavoq suliffeqarfimmi isummiussat pisariaqartitallu aallaavigalugit niuernermik pilersaarusiornissaq.
- Suli ilinniartuunerput pissutigalugu soqutigisatta pingaarnerasaraa sullitarput ilagalugu ilinniagaqarnissaq aamma suleqatigiinnissaq, taamaattumik suliavut akilersinnavianngilavut, kaospilotit pingasut isumaqarput, taakkua maajip naajartornerani sullitartik pillugu allaaserisamik piareersimasuutitaqartussat.
Ilisimatitsissutigaat nalunaarusiami assersuutigalugu niuerfik nutaaq pillugu ineriartortitsineq imaluunniit pilersitsineq eqqartorneqassammat, tassunga ilanngullugu niuerfiup allanik ilanngutsitsinissaminik pilersaarutaa namminneq isumassarsiani naapertorlugu ineriartortikkusutaminut. Assersuutigalugu makkuninnga imaqarsinnaapput, CSR pillugu ineriartortitsineq, ilinniartitaaneq, takornariaqartitsineq, aallarnisaasut imaluunniit aningaasarsiutiginagu suliniaqatigiiffiit.
Suliffeqarfiutilittut soqutiginnikkaani ilinniartut pingasut uunga saaffigineqarsinnaapput: sasjatjerrild@kaospilot.dk.