Nini patimik tunisisinnaasumik ilungersorluni pissarsiorpoq
Nini Tessing qanittukkut patimik tunineqarluni ikkussiffigineqanngippat ajornerpaamik pisoqarnissaa ernumassutigineqarpoq
Naak ukiuni qaangiuttuni qatanngutiminit Poul Tessingimit patimik ikkussiffigineqartarsimagaluarluni 22-nik ukiulik Nini Tessing Qaqortumeersoq kingumut aammigut kræftertutut paasineqarpoq.
Rigshospitalimi nakorsat maannakkut affarmik kalaallinit qallunaanillu akusaq inuusuttoq nunat tamat akornanni patimik tunisisinnaasut Hollandimi Leidenimi allattorsimaffimmut allappaat.
Nakorsat inummik immikkut ittumik timikut ipiutaasartaqartumik kalaallinit qallunaanillu kingoqqisuusumik ujarlerput. Piffissaagallartillugu patimik tunisisunnaasoqanngippat arnaata Sara Tessingip ajornerpaamik pisoqarnissaa ernummatigaa, taamaattumillu innuttaasunut affarmik kalaalliusunut qallunaajusunullu immikkut qinnuteqarpoq.
- Piffissaagallartillugu tunisisinnaasumik nassaanngikkutta ajornerpaamik pisoqarnissaa ernummatigaara. Nerioqaangali neriullungalu tunisisinnaasumik takkuttoqassasoq, siullermi aammaik tunisisussamik kingornalu patimik, Sara Tessing Sermitsiaq.AG-mut oqarpoq.
Februaarip qiteqqunnerani nakorsat nuanniitsumik tusarliipput aakkut kræfteriaatsip sakkortuup toqqutaasinnaasullu leukemip Nini Tessingip patia saaqqussimagaa. Taamaalilluni decembarimi 2010-mili arnaq inuusuttoq nappaammut akiuuppoq.
- VNovembarimi nuannaaqaagut Nini Qaqortumut angerlatinneqarmat. Kingorna initaarlunilu ilinniarnissaminut qinnuteqarpoq. Qilanaaqaaq, Sara Tessing oqarpoq.
Patimik tunisisinnaavoq timikkut aalajangersimasumik ipiutaasartaqassaaq Rigshospitalimilu allattugaalluni imaluunniit Odensemi, Aalborgimi Skejbymiluunniit.
Ullumikkut qallunaat 40.000-t Danmarkimi patimik tunisisinnaasut allattorsimaffiani allattugaapput, ukiullu tamaasa inuit 140-t missaanniittut taakku iluaqutigisarpaat.
Napparsimasut 25-30 procenti ilaquttaminnit patimik ikkussivigineqartarput, tamannalu aamma Nini Tessingimi misilinneqarsimavoq, pati ilaquttameersuummat.
Patilerneqartunit 100 missaanniittut ilaqutaanngitsumi pisarput. Tassnai patinik tunisisinnaasut allattorsimaffiat pisariaqartarpoq.
Nakorsat aamma nunat tamat akornanni patinik tunisisinnaasut allattorsimaffiannit 20 millioniusut akornannit ujaasipput. Nakorsarisamut saaffiginnittoqarsinnaavoq tunisisuunissamut tulluarnerluni paasiniarlugu.