Biilimit immiaqqanik tuniniaaneq arsaarinnissutaavoq
Angutit marluk 20-t sinnerlugit ukioqartut arfininngormat ullaakkut politiinit tigusarineqarput Nuummi biilimit immiaaqqamik tuniniaasimasutut
- Imigassamik tuniniaasinnaasutut akuersissuteqanngikkaanni niuertarfiulluniluunniit imigassamik tuniniaaneq inerteqqutaavoq. Taamaattullu paasineqaraangamik sakkortuumik pineqartarput. Ajoraluartumillu akulikitsumik pisarput, Nuummi Politiinit pigaartoq Karl Sværd Sermitsiaq.AG-mut oqaluttuarpoq.
Unnuaq arfininngornermiluunniit ullaassakkut politiit nalunaarfigineqarput Kuussuarmi inuinnaat biiliiniit immiaaqqamik tuniniaasoqartoq. Taamaattoqarporlu, ullaassakkut sisamanut imerniartarfiit tamarmik matoreersut inatsisaatsuliorluni immiaaqqamik tuniniaasoqarpoq. Angutit marluk immiaaqqanik 160-inik biiliniittuuteqarput politiit takkummata.
- Angutit marluk 20-t 30-illu akornanni ukioqartut politeeqarfiliaanneqarput, tassani inatsisaatsuliorlutik tuniniaanerat nalunaarusiorfiginerqarluni. Immiaaqqat 160-t arsaarinnissutaapput soorlu aamma unnuaq taanna kaaviiaartitaat 3.300 koruunit politiinit arsaarinnissutaallutik, Karl Sværd oqarpoq.
Angutit marluk aamma tamarmik immikkut 1.000 koruuninik akiliisinneqarput kingornalu iperagaallutik.
- Nalunaarutigisinnaavarput aamma immiaaqqanik pisineq inerteqqutaammat. Akiliisitaaneq immaqa 1.000 koruuniunngikkaluarpoq, paasineqaraannili pineqaatissiisoqassaaq, Karl Sværd oqarpoq.