Aatsitassat soqutigineqangaanngillat
Sapaatit akunnerpassuarni aatsitassat tamanit eqqartorneqarsimaqaat. Nunattali ujarai pillugit saqqummersitsinerup ammarneqarnera soqutigineqangaanngilaq
Sapaaatit akunnerni kingullerni marlussunni aatsitassat nunatta iluaniittut pillugit inatsit kikkunnit tamanit sammineqarsimasoq, taamaattumik uggornarpoq tallimanngornermi marsip 15-ani Nuuk Kunstmuseumimi INUA-nik atuakkiortup assiliisup Kristian Mainzip saqqummersitsinerata ammarneqarneranut ikittuinnaat takkummata.
- Kalaallit Nunaat nunarsuarmi immikkuullarissuuvoq. Silap pissusaa pinngortitamik immikkut ittumik pilersitsiinnarsimanngilaq aammali ujarassiornikkut nuna immikkuullarilluni. Kalaallit Nunaat nuanrsuarmi pisoqaanerpaamik qaarsoqarpoq, nunarsuullu kujaterpiaanit avannarpiaanut nunap nikikkiartorsimanerata nuna ilusilersimavaa. Nunaviit amiakkui nutaanut ilannguttarsimapput innermillu anitsisarnerit nutaanik qalliillutik. Saqqummersitsininni takutinniaragaakka misigisat annertuut, Kristian Mainz oqarpoq.
Ilisimatuumit Minik Rosingimit ujarassiortutut assilisanik atuakkamik nuannerisaqarluartumit taperserneqarpoq:
- Atuakkap uumap takunera nuannerlunilu oqiliallannaqaaq, Kristian Mainzimi nunata ujarassiornikkut inissisimaneranik takutitsivoq. Tassaniipput ujarassiornikkut eqqaamasat takorluukkallu, assilineqarlutik saqqummersinneqartut. Tassani takusinnaavagut nunatsinni sumiikkaluaruttaluunniit nunarput taannaasoq, ujarassiornikkullu takusavut alutorsaatigisinnaallutigik ilinniartinniarneqanngikkaluarluta. Assilisat eqqoqqissaartumik takutippaat Kalaallit Nunaata ujarassiornikkut inissisimanera qanoq pinnertigalunilu alutornartiginersoq.
Saqqummersitsineq apriilip 15-ata 2013-p tungaanut takuniarneqarsinnaavoq.