Pisiffik Nuuk Centerimi appasinnerusumik sinneqartoorpoq
Nuup Centerip pilersinnera Pisiffimmut annertuumik aningaasartuuteqarfiuvoq. Ukiumut sinneqartoorutit siornarniit appasinnerupput, kaaviiaartitsinerli annertusilluni
Aningaaseriviup tungaanut qungujulaarnissamut peqqutissaqarpoq naak Nuuk Centerimi Pisiffiup niuertarfinnik sisamanik angisuunik pilersitsinera annertuumik aningaasartuuteqarfiugaluartoq taamaattoq kaaviiaartitsineq 4 procentinik annertusisimalluni.
Taama Pisiffimmi pisortaaneq Per Steen Larsen tusagassiuutinut allappoq. Suliffeqarfiup ukiumut 2012-imut naatsorsuutai akuerineqarput. Taakkulu takutippaat 2012-imi kaaviiaartitsineq 964 million koruuniusimasoq,. Tassalu 2011-mut naleqqiullugu 4 procentinik qaffasinnerulluni.
Akileraartinnani ukiumi sinneqartoorutit 2011-miit appasinenrupput. Naatsorsuutini takuneqarsinnaavoq akileraartinnani sinneqartoorut 32 million koruuniusoq 2011-mi 49,8 million koruuniusimalluni.
Tamanan ingammik peqquteqarpoq Nuuk Centerimi niuertarfinnik sisamanik pilersitsinermik tassalu nerisassaarniarfik, Torrak-fashion, Pisattat aamma Elgiganteen. Tassaapput Pisiffiup aningaasaliisarnerani annertunerpaat.
- Nunatta kitaani tamarmi niuertarfinnik ingerlatsinermut pitsanngorsartuassavarput suliffeqarfiup niuernikkut inissisimanera Kalaallit Nunaanni pisiffigiumaneqarnerpaanngortinniarlugu. Ukiuni kingullerni niuertarfeqarnikkut annertuunik aningaasaliinerit suliffeqarfiup unammillersinnaanera nukittorsassagaat ilimagineqarpoq kaaviiaartitsinerup isertitaqarnerullu annertusiartortuarnissaa qulakkeerlugu, Per Steen Larsen oqarpoq.