Qinersinerup inernera saqqummiunneqarmat piginneqataassutit nalingat appariarpoq
Inuit aatsitassarsiornikkut piginneqataassuteqartut nakkutigeqqissaarpaat Inatsisartunut qinersineq qanoq inerneqassanersoq. Akitsuutinik akiliisarlersinnaaneq aatsitassarsiornikkut piginneqataassutit nalinginik appariartitsivoq
Ulluni makkunani nunarsuarmi tamarmi nunarput alaatsinaanneqarpoq amerlanerussuteqartut IA tunullugu Siumut taagormassuk.
Nutaarsiassaqartitsivimmi Global Miningimi allapput kalaallit "aatsitassalerisunut inussiarnersut" (IA, aaqq.) naaggaartut ernummatigigamikkut Kinamiut inuiaqatigiinni kalaallini sunniuteqarpallaalernissaat.
Qinersinermi ajugaasoq Aleqa Hammond pillugu Global Mining allappoq qinersisartut neriorsorsimagai aatsitassarsiornermi akitsuuteqartitsinissaq piumasaqaatiginiaraa aammalu neriorsuisimalluni Kinamiit suliartortut amerlanerpaaffissinneqarumaartut.
London Miningimi piginneqataassutit nalingi qinersinermi patajaatsumik inissisimariarlutik kitsisinerup ingerlanerani pingasunngormat Londonimi appariapiloorpoq, Global Mining allappoq.