Qaleralittassat nungulerpaat

Upernaviup aqutsiveqarfiani umiatsiaararsortut qaleralinniarnerat tunisinerallu ataasinngorneq martsip 18-at unikkallartussanngorpoq

Sikkorinnera ukiuunerani aalisarluartitsisarpoq. Assi.: GFLK

Upernaviup aqutsiveqarfiani umiatsiaararsortut kvartalimut qaleralittassaat nungulerput. Ukiup sikua aalisarluarnermut pissutaatinneqarpoq.

Ukiuunerani sikkorissinerata kingorna Upernaviup aqutsiveqarfiani umiatsiaararsortut aalisarlualersimapput. Qalerallit qamuteralannik qimussimillu sikukkut assartorneqarput maannalu aalisartut porskimi sulinngiffeqajaartussanngorput qalerallinniarneq apriilip aallaqqaataata tungaanut uninngagallassammat.

- Sikkoritsillugu aalisarluartoqartarsimavoq ukiormannalu tassa aamma taama pisoqarpoq, Ole Petersen Upernavimmiit KNAPKp siulersuisuunerini ilaasortaq Sermitsiaq.AG-mut nassuiaavoq.

Upernavimmi eqqaanilu aalisartut sikunerata kingorna aalisalertorsimapput maannalu kvartalimut pisassaanni 72 tonsit kiserngorupput. Uummannami umiatsiaararsortut suli pisassaqarluarput suli 364 tonsinik pisassaqaramik aammalu Qeqertarsuup tunuamiut suli 629 tonsinik pisassaqarlutik.

Angallatit 6 meteri sinnerlugu angissusillit suli aamma pisassaqarluarput. Upernavimmi angallatit suli 3.429 tonsinik pisassaqarput, Uummannami 2.201 tonsit kiisalu Qeqertarsuup tunuani angallatit suli 4.145 tonsinik pisassaqarlutik.

Pisassat pisarinngitsuukkat kvartalip tullianut nuunneqarsinnaapput.

Powered by Labrador CMS