Sulisitsisut: Siumut IA-lu imminnut nassaarisariaqarput

Sisamanngorpat ualikkut Siumup siulittaasua Aleqa Hammond naalakkersuisunngortitsinissamut sapaatit akunnerisa tulliit ingerlanerini pisussamut partiinik kaffisoqateqalersaarpoq. Naallu maannakkut Siumup Inuillu Ataqatigiit nutaamik naalakkersuisooqatigiilernissaannik isikkoqanngikkaluartoq Kalaallit Nunaanni Sulisitsisut Peqatigiiffiani GA-mi pisortaq Brian Buus Pedersen allatut ittumik kajumissaaruteqarpoq.

- Assersuutigalugu suliniutinut angisuunut inatsimmut ilinniartitaanermullu atatillugu avataaniit isigalugu IA-p Siumullu akornanni isumaqatigiinngittoqaraluartoq assigiinngissutaat ima annertutiginngillat naalakkersuinikkut silatusaarnikkut qaangerneqarsinnaanatik, Brian Buus Pedersen oqarpoq.

- Demokraatit IA-lu qinigaaffimmi tamakkiisumi naalakkersuinikkut suliniutut peqatigiillutik ingerlassinnaappatigit taava Siumut IA-lu taamaaliorsinnaasariaqarput, kingumut. Tunngaviatigut anguniagaat assigiipput. Nunatsinni naalakkersuinermi sulinermi aaqqigiinnginnerit inunnut tunnganerupput naalakkersuinermuunngitsoq. Aaqqiagiinnginnerilli aaqqinneqarsinnaapput, soorlu qanittukkut Clement Kjersgaardip TV-kut oqallitsitsinerani Kuupik V. Kleist oqartoq matu ammarneqarsinnaallunilu matuneqarsinnaasoq, taamaanngippammi matuusimassanngilaq!

- Aatsitassanut inatsit allanullu inuussutissarsiornikkut suliniutit isumaqatigiissutiginissaat taamaallaat pineqanngilaq. Tassani soorunami pingaarluinnartuuvoq atugassarititaasut ersarissut pilersinneqarnissaat, aningaasaliiniartunut suliffeqarfinnullu niuernikkut nalorninertulinnut aningaasaleerusussinnaasunut toqqissisimanarlutillu ersarissunik. Taamaanngippammi inuussutissarsiornikkut ineriartornissaq pisariaqartitarput angunavianngilarput, Brian Buus Pedersen oqarpoq.

Ataqatigiinneq avissaartuunneq pinnagu

Soqutigisat, kattuffinni ileqquusut naalakkersuinikkullu assigiinngissutit akimorlugit ataqatigiinnissaq aatsaat taamma pingaartigaaq, GA-mi pisortaq oqarpoq.

Taamaattumik naalakkersuinermik suliallit GA-mit kajumissaarneqarput siuttusinnaanertik takutissagaat naalakkersuinnikkut iluatsitaariniarnerit inuttullu assigiinngissutit tunulliullugit.

- Tamat naalakkersueqataanerat immikkoorniarnermik politikkeqarnikkut innarlerneqassaaq. Inatsisartuni immikkoortut illuatungerit marluk imminnut tusaaniartariaqarput pisariaqartumillu naapeqatigiillutik, nunatsinnimi taamaattoqarnissaa pisariaqarteqaarput, Brian Buus Pedersen oqarpoq.

- Naalakkersuinikkut assigiinngissutit ima annertutigisariaqanngillat anguniakkat taluneqarlutik. Tunaartarisaq tammaaneqarpat tamatta ajorsassaagut, tamannalu naalakkersuinikkut akisussaassuseqannginnerussaaq. Angusassat sivisuumik atasinnaasut innuttaasut paasisinnaasaat suleqatigiissutiginissaat anguniagaasariaqarpoq.

Partiini marlunni nukiit pitsaasut

- Demokrati pillugu oqaatsit kusanartut malinneqassappata Siumup IA-llu aaqqiagiinngissutitik annertuut taamaatittariaqarpaat. Partiini marlunnipput nukiit pitsaasut naalakkersuisunngortitsinermi kattunneqarlutik atorneqartariaqartut, imaluunniit Inatsisartuni arlaatigut isumaqatigiittoqarluni sivisuumik atasinnaasumik angusaqarsinnaassagutta. Taamaassappalli isaassisoqartariaqarpoq. Minnerunngitsumik ajugaasunit, Brian Buus Pedersen oqarpoq.

- Imaattumik kajumissaaruteqarpugut: Aatsitassanut inatsisip, suliniutit angisuut pillugit inatsisip, inuussutissarsiorsinnaanermut inatsisip imaluunnniit isumaginninnikkut ilinniartitaanikkullu politikkip allanngortinnissaannut annikittuinnarmik angusaqarnissaq pinnagu atituumik naapeqatigiinnissaq pilersinneqarli atugassarititaasunik sivisuumik patajaatsumillu atasinnaasunik qulakkeerisumik. Amerlanerussuteqalaarneq naalakkersuinikkut nalorniffiullunilu aalajaatsuunavianngilaq, tamannalu marsip 12-ani qinersinerup kingorna innuttaasunut inuussutissarsiuteqartunulluunniit iluaqutaanavianngilaq.